Жаҳон иқтисодиёти ва дипломатия университетига максимал балл тўплаган, аммо контракт асосида ўқишга кирган 5 нафар абитуриент президент имтиёзи асосида грантда ўқийдиган бўлди.
Бош вазир матбуот котиби Бекзод Ҳидоятовнинг маълум қилишича, Шавкат Мирзиёев топшириқларига асосан таълим ташкилотларига қабул қилиш бўйича Давлат комиссиясининг навбатдаги баёни қабул қилинди.
Унга кўра, Жаҳон иқтисодиёти ва дипломатия университетининг Халқаро муносабатлар йўналиши (ўзбек гуруҳи)га энг юқори — 189 балл тўплаган аммо тўлов-контракт асосида тавсия этилган қуйидаги абитуриентлар:
- Ахатова Азиза Шухрат қизи;
- Абдулвохидова Мухайёхон Лутфулло қизи;
- Хўжабеков Убайдулло Неъматович;
- Иргашева Мухлиса Азизбек қизи;
- Тилаволдиев Санжар Зафаржон ўғли президент томонидан берилган имтиёз бўйича давлат гранти асосида ўқийди.
Эслатиб ўтамиз, ОТМларга кириш имтиҳони натижалари эълон қилингач, максимал балл тўплаб ҳам контракт асосида ўқишга кирган абитуриентлар мавзуси ва “Темурбеклар мактаби” битирувчиларига берилган имтиёз жамоатчилик эътирозларига сабаб бўлганди. Хусусан, ҳуқуқшунос блогер Хушнудбек Худойбердиев имтиҳон натижаларига имтиёзли балл қўшмаслик кераклиги ва “Темурбеклар мактаби” битирувчиларига имтиёз берилган тақдирда ҳам, фақат ҳарбий ОТМлар учун берилиши лозимлигини қайд этганди.
Билим ва малакаларни баҳолаш агентлиги раҳбари Мажид Каримов бу масала давлат комиссияси томонидан кўриб чиқилишини айтганди.
“189 балл олган абитуриентлар сони 61 та бўлди. Бундан ташқари, ъТемурбеклар мактабиъ битирувчиларига ОТМга киришда 15 фоиз қўшиб берилади. Шу сабабли уларнинг балли 189 баллдан юқори бўлди. Кимга имтиёз берилади, кимга алоҳида квота берилади... Буларнинг ваколати Билимни баҳолаш агентлигида ҳам эмас, Олий таълим вазирлиги ваколатида ҳам эмас. Биринчи навбатда таълим муассасаларига қабул қилиш давлат комиссияси бор. Бу ана шу комиссия ваколатидаги вазифа”, — деган эди у кириш тест синовлари якунлари бўйича ўтказилган матбуот анжуманида.
Олий таълим, фан ва инновациялар вазирлигининг қабул жараёнларини ташкил этиш бўлими бошлиғи Абдусамат Маманазаров ҳар йили энг юқори натижа қайд этган 200 нафар абитуриентга президент гранти берилишини, бу бўйича таҳлиллар олиб борилаётганини маълум қилганди.
Изоҳ (0)