O‘zbekistonning Polshadagi elchisi Bahrom Boboyev Luba Sohn Holding kompaniyasi rahbari Kshishtof Slabi bilan uchrashdi. Bu haqda “Dunyo” agentligi xabar berdi.
Qayd etilishicha, muloqot chog‘ida O‘zbekistonda turar joylar, binolar va sanoat inshootlarini termal modernizatsiyalashda qo‘llanadigan ko‘pikli polistirol bloklar (penoplast) hamda butlovchi qismlar ishlab chiqaruvchi zavod qurilishiga to‘g‘ridan to‘g‘ri sarmoya kiritish masalasi muhokama qilingan.
Yangi zavod qurilishi uchun rejalashtirilgan investitsiyalar hajmi taxminan 7-10 million dollarni tashkil etadi. Zavod 300-400 nafar kishini ish bilan taʼminlash imkoniyatiga ega bo‘ladi. Maʼlum qilinishicha, zavod yiliga qalinligi 30-200 millimetrgacha bo‘lgan 300 ming kubometr penoplast va kelajakda unga qo‘shimcha to‘rlar, yelim, poydevor boltlari, ilgaklar, akril suvoq, mog‘or va namlanishga qarshi vositalar ishlab chiqarish quvvatiga ega bo‘ladi.
Besh gektar maydonni tashkil etuvchi zavod ishlab chiqarish bo‘limlari, logistika markazi, laboratoriya, tayyor mahsulot omborlari va boshqalarni o‘z ichiga oladi.
Polsha tomoniga O‘zbekistonning sarmoyaviy imkoniyatlari, xorijiy investorlar uchun yaratilgan imtiyoz va yengilliklar, mamlakat hududlarida tashkil etilgan erkin iqtisodiy va kichik sanoat zonalari faoliyati haqida batafsil maʼlumot berildi.
O‘zbekiston elchixonasi tez orada investitsiya bilan bog‘liq masalalarni muhokama qilish maqsadida Luba Sohn Holding va “O‘zqurilishmateriallari” AJning masʼul xodimlari va mutaxassislari ishtirokida videokonferensiya tashkil etadi. Uning natijasida Polsha kompaniyasi delegatsiyasini oktabr oyida O‘zbekistonga yuborish to‘g‘risida qaror qabul qilinadi.
Bundan oldin Xitoy kompaniyasi Andijonda quyosh fotoelektr stansiyasini, Janubiy Koreya esa O‘zbekistonda poligonlardan chiqayotgan gazlarni ushlab qoluvchi obyekt qurishi to‘g‘risida xabar berilgandi.
Izoh (0)