O‘zbekiston musulmonlari idorasi Fatvo markazi Islom dinida oltin qo‘shilgan taomlarni yeyish mumkinmi degan savolga javob berdi.
Fatvo markazining qayd etishicha, oltinni o‘zini yeyish yoki uni biror taomga qo‘shib tanovul qilish dinda durust emas.
Birinchidan, aslida oltin va kumush naqd pul hamda ayollarga ziynat qilib yaratilgan. Uni yeydigan narsaga aylantirish joiz emas. Bunday qilish sharʼiy va insoniy urfga ziddir. Chunki biror bir millat, din yoki jamiyat oltin va kumushni taom sifatida qabul qilmagan.
Qurʼoni karimda Alloh taolo shunday degan: “Biz aytdik: Ey Odam, sen va jufting (Havvo) jannatda yashangiz va xohlagan joylaringizda undan (neʼmatlaridan) bemalol tanovul qilingiz. Faqat mana bu daraxtga yaqinlashmangiz, (aks holda) zolimlardan bo‘lib qolursiz (Baqara surasi,35-oyat).
Ushbu oyatda yemaslik kerak bo‘lgan narsani yeyish zulm, deb eʼtiborga olinmoqda. Demak, tilla yoki kumushni yeyish ham zulm hisoblanadi.
Ikkinchidan, oltin va kumushdan yasalgan idishlarda taomlanish va ichish ham joiz emas. Payg‘amg‘ambarimiz alayhissalom bu haqda shunday deganlar: Oltin va kumush idishlarda (taom va suv) ichmanglar...(Muttafaqun alayh).
Ulamolarimizning so‘zlariga ko‘ra, bu qaytariqning sababi oltin va kumush idishlarda yeb-ichish kibr hamda faxrga olib boradi va faqir insonlarning ko‘nglini sindiradi. Ushbu salbiy sifatlar oltinni idish sifatida ishlatgandan ko‘ra oltinni isteʼmol qilishda ko‘proq topiladi. Bu esa o‘z navbatida inson qalbidagi bandalik sifatini yo‘qolishiga sabab bo‘ladi.
Uchinchidan, bu molni isrof va zoye qilish va neʼmatlarning qadrini yerga urish hisoblanadi. Payg‘ambarimiz alayhissalom yeb-ichish, sadaqa va kiyinishda isrof qilish hamda kibrga ketishdan qaytarib shunday deganlar: Modomiki isrof va kibr aralashmas ekan yenglar, ichinglar, sadaqa qilinglar va kiyinglar (Imom Ibn Moja rivoyati).
Boshqa hadisi sharifda Rasululloh sallallohu alayhi va sallam: Alloh taolo qiylu qol (mish-mish tarqatish), ko‘p savol berish va molni zoye qilishingizni yomon ko‘radi, deganlar (Imom Muslim rivoyatlari).
“Ayrim tabiblar shifo maqsadida kam miqdorda oltin isteʼmol qilishni tavsiya qilgan bo‘lishi mumkin. Bu zaruratda boshqa dori qolmagani uchun “harom bilan davolanish” bobidan bo‘lib, alohida mavzu hisoblanadi. Lekin odatdagi holatda tilla va kumushni taomga qo‘shib yeyish halol emas. Vallohu aʼlam”, —deyiladi Fatvo markazi xabarida.
Bundan oldin O‘zbekiston musulmonlari idorasi Fatvo markazi ijtimoiy tarmoqlarda yigit onasining oyog‘i yuvilgan suvni ichgani tasvirlangan videoga munosabat bildirgandi.
Izoh (0)