O‘zbekistonning Olmaotadagi Bosh konsulligida “Rodnik” jamoat fondi bilan hamkorlikda UNICEF’ning “Migratsiya jarayonlarida bolalarni himoya qilish” loyihasi doirasida mehnat muhojirlari orasidagi mushkul hayotiy vaziyatga tushib qolgan o‘zbekistonliklar uchun xayriya tadbiri tashkil etildi. Bu haqda “Dunyo” agentligi xabar berdi.
Xayriya tadbiri davomida diplomatlar chet ellardagi fuqarolarini himoya qilish, ularni qo‘llab-quvvatlash va murakkab vaziyatlarda ularga zarur yordam ko‘rsatish yuzasidan O‘zbekiston hukumati yuritayotgan siyosat haqidagi atroflicha maʼlumotlarni ishtirokchilar bilan o‘rtoqlashgan.
“ ‘Rodnik’ jamoat fondi vakillari Bosh konsullikka insonparvarlik tadbirini amalga oshirishda ko‘rsatilayotgan ko‘magi, Qozog‘istonda o‘zbekistonlik mehnat muhojirlarining huquq va manfaatlarini himoya qilish bo‘yicha ikki tomonlama hamkorlikni davom ettirishga bo‘lgan irodasi uchun minnatdorlik bildirdi”, — deyiladi xabarda.
Tadbir chog‘ida ishsizligi tufayli mushkul ahvolga tushib qolgan O‘zbekiston fuqarolaridan iborat besh oilaga va 10 nafar bolaga 800 dollar miqdoridagi gumanitar yordam — o‘quv qurollari, kitoblar, gigiyena va antiseptik vositalari topshirilgan.
Bundan oldin Rossiyaga ishlash uchun borib, vafot etgan ayolning 9 yoshli qizi O‘zbekistonga qaytarilgani to‘g‘risida xabar berilgandi. Shuningdek, Misrda avtohalokatga uchrab, og‘ir tan jarohati olgan o‘zbekistonlik ayol vatanga qaytarilgan, Rossiyada eri qamalib, chaqalog‘i bilan qiyin ahvolda qolgan ayolga yordam ko‘rsatilgan edi.
Izoh (0)