Ўзбекистоннинг Олмаотадаги Бош консуллигида “Родник” жамоат фонди билан ҳамкорликда UNICEF’нинг “Миграция жараёнларида болаларни ҳимоя қилиш” лойиҳаси доирасида меҳнат муҳожирлари орасидаги мушкул ҳаётий вазиятга тушиб қолган ўзбекистонликлар учун хайрия тадбири ташкил этилди. Бу ҳақда “Дунё” агентлиги хабар берди.
Хайрия тадбири давомида дипломатлар чет эллардаги фуқароларини ҳимоя қилиш, уларни қўллаб-қувватлаш ва мураккаб вазиятларда уларга зарур ёрдам кўрсатиш юзасидан Ўзбекистон ҳукумати юритаётган сиёсат ҳақидаги атрофлича маълумотларни иштирокчилар билан ўртоқлашган.
“ ‘Родник’ жамоат фонди вакиллари Бош консулликка инсонпарварлик тадбирини амалга оширишда кўрсатилаётган кўмаги, Қозоғистонда ўзбекистонлик меҳнат муҳожирларининг ҳуқуқ ва манфаатларини ҳимоя қилиш бўйича икки томонлама ҳамкорликни давом эттиришга бўлган иродаси учун миннатдорлик билдирди”, — дейилади хабарда.
Тадбир чоғида ишсизлиги туфайли мушкул аҳволга тушиб қолган Ўзбекистон фуқароларидан иборат беш оилага ва 10 нафар болага 800 доллар миқдоридаги гуманитар ёрдам — ўқув қуроллари, китоблар, гигиена ва антисептик воситалари топширилган.
Бундан олдин Россияга ишлаш учун бориб, вафот этган аёлнинг 9 ёшли қизи Ўзбекистонга қайтарилгани тўғрисида хабар берилганди. Шунингдек, Мисрда автоҳалокатга учраб, оғир тан жароҳати олган ўзбекистонлик аёл ватанга қайтарилган, Россияда эри қамалиб, чақалоғи билан қийин аҳволда қолган аёлга ёрдам кўрсатилган эди.
Изоҳ (0)