Toshkent shahrining Chilonzor tumanidagi ko‘p qavatli uylardan biri cho‘kib, devorlari yorilgani ma’lum bo‘ldi. Bu haqda tuman hokimligi axborot xizmati xabar tarqatdi.
Ta’kidlanishicha, ijtimoiy tarmoqlarda Chilonzor tumanidagi “Naqqoshlik” mahallasida joylashgan 21-sonli ko‘p qavatli uyning yashash uchun yaroqsiz holga kelib qolgani haqida xabar tarqalgan.
Tuman hokimligining tegishli mutasaddilari tomonidan ko‘rsatilgan manzilda o‘rganish o‘tkazildi. Ma’lum bo‘lishicha, ko‘rsatilgan manzildagi 4 qavatli ushbu bino 1970-yilda qurilgan bo‘lib, unda 4 ta yo‘lak va 71 ta xonadon joylashgan. Mazkur binoning bir tomonida cho‘kish holati bo‘lganligi sababli haqiqatdan binoning devorlari yorilgan, — deyiladi hokimlik xabarida.
Qo‘shimcha qilinishicha, tuman hokimligi tomonidan binoni texnik jihatdan o‘rganish yuzasidan “O‘zGASHKLITI” institutiga hamda Gidrologiya va muhandislik geologiyasi institutiga xatlar jo‘natilgan.
Mazkur tashkilotlar tomonidan tegishli xulosalar berilgandan so‘ng ushbu muammoni bartaraf etish choralari ko‘rilishini ma’lum qilamiz», — deydi hokimlik mas’ullari.
Izoh (0)