Hindiston janubidagi Kerala shtati rasmiylari ikki kishining o‘limiga sabab bo‘lgan Nipax virusi tarqalishining oldini olish choralarini ko‘rmoqda. Davlat ommaviy test sinovlarini o‘tkazmoqda, ta’lim muassasalarini yopmoqda, aholi ogohligini oshirmoqda.
Shtat rahbari Pinarayi Vajayanning aytishicha, virus deyarli 2 million aholi istiqomat qiladigan Kojikode shahrida aniqlangan. Vazir aholini qo‘rqmaslikka, shu bilan birga ehtiyot bo‘lishga chaqirdi.
Nipax virusi paramiksoviruslar oilasiga mansub bo‘lib, qanotli zararkunandalar, asosan, ko‘rshapalaklar tomonidan tashiladi.
Virus, shuningdek, kasal odam bilan muloqot qilish orqali ham yuqadi. Infeksiyaning birinchi alomatlari orasida bosh og‘rig‘i, uyquchanlik kuzatiladi, keyin ba’zi hollarda o‘tkir respirator sindromi va miyaning yallig‘lanishi rivojlanishi mumkin.
Kasallangan bemor komaga tushib, vafot etishi mumkin. Ushbu virusga qarshi vaksina hali mavjud emas, bemorlarga faqat qo‘llab-quvvatlovchi terapiya ko‘rsatiladi. Virus birinchi marta 1999-yilda Malayziyada aniqlangan bo‘lib, o‘shanda 300 ga yaqin odam kasallikni yuqtirgan, ulardan 100 dan ortig‘i esa vafot etgandi.
Bu 2018-yildan beri Keralada Nipax virusining to‘rtinchi avj olishidir. CNN ma’lumotlariga ko‘ra, hozirgi bosqichda shtat rasmiylari kasallangan va vafot etganlar bilan aloqada bo‘lgan 700 dan ortiq odamni aniqladilar. Ularning 70 dan ortig‘ida kasallikning rivojlanish xavfi yuqori deb topilib, izolyatsiya qilingan va doimiy kuzatuv ostiga olingan.
Izoh (0)