Ҳиндистон жанубидаги Керала штати расмийлари икки кишининг ўлимига сабаб бўлган Нипах вируси тарқалишининг олдини олиш чораларини кўрмоқда. Давлат оммавий тест синовларини ўтказмоқда, таълим муассасаларини ёпмоқда, аҳоли огоҳлигини оширмоқда.
Штат раҳбари Пинарайи Важаяннинг айтишича, вирус деярли 2 миллион аҳоли истиқомат қиладиган Кожикоде шаҳрида аниқланган. Вазир аҳолини қўрқмасликка, шу билан бирга эҳтиёт бўлишга чақирди.
Нипах вируси парамиксовируслар оиласига мансуб бўлиб, қанотли зараркунандалар, асосан, кўршапалаклар томонидан ташилади.
Вирус, шунингдек, касал одам билан мулоқот қилиш орқали ҳам юқади. Инфекциянинг биринчи аломатлари орасида бош оғриғи, уйқучанлик кузатилади, кейин баъзи ҳолларда ўткир респиратор синдроми ва миянинг яллиғланиши ривожланиши мумкин.
Касалланган бемор комага тушиб, вафот этиши мумкин. Ушбу вирусга қарши вакцина ҳали мавжуд эмас, беморларга фақат қўллаб-қувватловчи терапия кўрсатилади. Вирус биринчи марта 1999 йилда Малайзияда аниқланган бўлиб, ўшанда 300 га яқин одам касалликни юқтирган, улардан 100 дан ортиғи эса вафот этганди.
Бу 2018 йилдан бери Кералада Нипах вирусининг тўртинчи авж олишидир. CNN маълумотларига кўра, ҳозирги босқичда штат расмийлари касалланган ва вафот этганлар билан алоқада бўлган 700 дан ортиқ одамни аниқладилар. Уларнинг 70 дан ортиғида касалликнинг ривожланиш хавфи юқори деб топилиб, изоляция қилинган ва доимий кузатув остига олинган.
Изоҳ (0)