Fransiya Apple kompaniyasiga iPhone 12 modellari elektromagnit nurlanishni haddan tashqari ko‘p chiqarayotgani sababli ushbu modellarni sotishni to‘xtatishni buyurdi. 12-sentabr kuni Fransiya milliy chastotalar agentligi (ANFR) mamlakatda Apple kompaniyasining iPhone 12 smartfonlarini sotishni vaqtincha taqiqlashga qaror qildi. Bu haqda ANFR saytida chop etilgan xabarda aytiladi.
ANFR Apple kompaniyasiga agar dasturiy ta’minotni yangilash orqali muammo hal qilinmasa, mamlakatda sotilgan barcha iPhone 12 ni qaytarib olishini tavsiya qildi.
Avvalroq Jahon sog‘liqni saqlash tashkiloti mobil telefonlar chiqaradigan radiatsiya haqidagi xavotirlarni bosishga harakat qilgandi. JSST veb-saytida aytilishicha, past darajadagi elektromagnit maydonlari odamlar uchun zararli degan xulosaning hech qanday dalili yo‘q.
iPhone 12 birinchi marta 2020-yil sentabrda chiqarilgan va hali ham butun dunyo bo‘ylab sotilmoqda.
Apple ANFR tekshiruviga e’tiroz bildirmoqda, kompaniya regulyatorga o‘zi va uchinchi tomonlar o‘tkazgan laboratoriya tekshiruvi natijalarini taqdim etganini ta’kidladi. Unda aytilishicha, iPhone 12 butun dunyo bo‘ylab radiatsiya darajasi bo‘yicha qoidalarga muvofiq deb tan olingan.
Fransiya raqamli texnologiyalar vaziri Jan-Noel Barro sotuvni taqiqlash qarorini iPhone 12 da radiatsiya darajasi maqbul chegaradan yuqori ekani bilan izohladi. Uning so‘zlariga ko‘ra, ANFR iPhone 12 ning SAR darajasi (bir soniyada inson tanasi to‘qimalarida so‘rilgan elektromagnit maydon energiyasini aniqlaydigan ko‘rsatkich) qonuniy ruxsat etilganidan yuqori ekanini aniqlagan.
“Apple ikki hafta ichida javob berishini kutyapmiz”, — dedi u. “Bunday bo‘lmasa, men muomalada bo‘lgan iPhone 12 larni ham qaytarib olishga ko‘rsatma bermoqchiman. Qoidalar hamma uchun bir xil. Hukumat murosaga kelmaydi. Har bir kompaniya ularga rioya qilishi kerak, Apple ham bundan mustasno emas”.
ANFR maʼlumotlariga ko‘ra, qurilmaning SAR ko‘rsatkichi 1 kilogramm uchun 5,7 vatt, Yevropa Ittifoqida ruxsat etilgan maksimal qiymati esa 1 kilogram uchun 4 vatt.
Izoh (0)