Франция Apple компаниясига iPhone 12 моделлари электромагнит нурланишни ҳаддан ташқари кўп чиқараётгани сабабли ушбу моделларни сотишни тўхтатишни буюрди. 12 сентябрь куни Франция миллий частоталар агентлиги (ANFR) мамлакатда Apple компаниясининг iPhone 12 смартфонларини сотишни вақтинча тақиқлашга қарор қилди. Бу ҳақда ANFR сайтида чоп этилган хабарда айтилади.
ANFR Apple компаниясига агар дастурий таъминотни янгилаш орқали муаммо ҳал қилинмаса, мамлакатда сотилган барча iPhone 12 ни қайтариб олишини тавсия қилди.
Аввалроқ Жаҳон соғлиқни сақлаш ташкилоти мобил телефонлар чиқарадиган радиация ҳақидаги хавотирларни босишга ҳаракат қилганди. ЖССТ веб-сайтида айтилишича, паст даражадаги электромагнит майдонлари одамлар учун зарарли деган хулосанинг ҳеч қандай далили йўқ.
iPhone 12 биринчи марта 2020 йил сентябрда чиқарилган ва ҳали ҳам бутун дунё бўйлаб сотилмоқда.
Apple ANFR текширувига эътироз билдирмоқда, компания регуляторга ўзи ва учинчи томонлар ўтказган лаборатория текшируви натижаларини тақдим этганини таъкидлади. Унда айтилишича, iPhone 12 бутун дунё бўйлаб радиация даражаси бўйича қоидаларга мувофиқ деб тан олинган.
Франция рақамли технологиялар вазири Жан-Ноэл Барро сотувни тақиқлаш қарорини iPhone 12 да радиация даражаси мақбул чегарадан юқори экани билан изоҳлади. Унинг сўзларига кўра, ANFR iPhone 12 нинг SAR даражаси (бир сонияда инсон танаси тўқималарида сўрилган электромагнит майдон энергиясини аниқлайдиган кўрсаткич) қонуний рухсат этилганидан юқори эканини аниқлаган.
“Apple икки ҳафта ичида жавоб беришини кутяпмиз”, — деди у. “Бундай бўлмаса, мен муомалада бўлган iPhone 12 ларни ҳам қайтариб олишга кўрсатма бермоқчиман. Қоидалар ҳамма учун бир хил. Ҳукумат муросага келмайди. Ҳар бир компания уларга риоя қилиши керак, Apple ҳам бундан мустасно эмас”.
ANFR маълумотларига кўра, қурилманинг SAR кўрсаткичи 1 килограмм учун 5,7 ватт, Европа Иттифоқида рухсат этилган максимал қиймати эса 1 килограм учун 4 ватт.
Изоҳ (0)