O‘zbekistonda hafta davomida qanday ob-havo kutilayotgani ma’lum qilindi

O‘zgidromet 11—15-sentabr kunlari uchun ob-havo prognozini e’lon qildi.

Unga ko‘ra, 11-sentabr, dushanba kuni kunduzi O‘zbekiston hududi bo‘yicha havo biroz bulutli bo‘ladi, baʼzi joylarda o‘zgarib turadi, yog‘ingarchilik kutilmaydi, Buxoro, Navoiy viloyatlarining ayrim joylarida va kunning ikkinchi yarmida Toshkent viloyatining baʼzi joylarida, respublikaning tog‘oldi va tog‘li hududlarida qisqa muddatli yomg‘ir yog‘ishi, momaqaldiroq bo‘lishi mumkin.

Baʼzi joylarda shamol tezligi 15-20 metr/sekundgacha kuchayadi, shimolda, janubda va cho‘l hududlarda 21-23 metr/sekundgacha kuchayishi, ayrim joylarda chang-to‘zon bilan kuzatilishi mumkin. Harorat 29-32 daraja bo‘ladi.

Keyinchalik, hafta oxirigacha, respublika bo‘yicha O‘zbekistonda kuz fasli boshi uchun xos bo‘lgan asosan kam bulutli va quruq ob-havo bo‘lishi kutilmoqda.

Tog‘li hududlarda 12—13-sentabr kunlari baʼzi joylarda qisqa muddatli yomg‘ir yog‘ishi, momaqaldiroq bo‘lishi mumkin, 14—15 sentabrda yog‘ingarchilik kutilmaydi.

Toshkentda 11-sentabr kuni kunning ikkinchi yarmida qisqa muddatli yomg‘ir yog‘ishi, momaqaldiroq bo‘lishi mumkin, shamol tezligi 12-15 metr/sekundgacha kuchayadi. Harorat 30-32 daraja bo‘ladi.

12—15-sentabr kunlari havo asosan biroz bulutli bo‘ladi, yog‘ingarchilik kutilmaydi. Shamol sharqdan 3-8 metr/sekund tezlikda esadi. Harorat 12-sentabrda 26-28 daraja, 13—15-sentabrda 28-30 daraja bo‘ladi.