Ўзбекистонда ҳафта давомида қандай об-ҳаво кутилаётгани маълум қилинди

Ўзгидромет 11—15 сентябрь кунлари учун об-ҳаво прогнозини эълон қилди.

Унга кўра, 11 сентябрь, душанба куни кундузи Ўзбекистон ҳудуди бўйича ҳаво бир оз булутли бўлади, баъзи жойларда ўзгариб туради, ёғингарчилик кутилмайди, Бухоро, Навоий вилоятларининг айрим жойларида ва куннинг иккинчи ярмида Тошкент вилоятининг баъзи жойларида, республиканинг тоғолди ва тоғли ҳудудларида қисқа муддатли ёмғир ёғиши, момақалдироқ бўлиши мумкин.

Баъзи жойларда шамол тезлиги 15-20 метр/секундгача кучаяди, шимолда, жанубда ва чўл ҳудудларда 21-23 метр/секундгача кучайиши, айрим жойларда чанг-тўзон билан кузатилиши мумкин. Ҳарорат 29-32 даража бўлади.

Кейинчалик, ҳафта охиригача, республика бўйича Ўзбекистонда куз фасли боши учун хос бўлган асосан кам булутли ва қуруқ об-ҳаво бўлиши кутилмоқда.

Тоғли ҳудудларда 12—13 сентябрь кунлари баъзи жойларда қисқа муддатли ёмғир ёғиши, момақалдироқ бўлиши мумкин, 14—15 сентябрда ёғингарчилик кутилмайди.

Тошкентда 11 сентябрь куни куннинг иккинчи ярмида қисқа муддатли ёмғир ёғиши, момақалдироқ бўлиши мумкин, шамол тезлиги 12-15 метр/секундгача кучаяди. Ҳарорат 30-32 даража бўлади.

12—15 сентябрь кунлари ҳаво асосан бир оз булутли бўлади, ёғингарчилик кутилмайди. Шамол шарқдан 3-8 метр/секунд тезликда эсади. Ҳарорат 12 сентябрда 26-28 даража, 13—15 сентябрда 28-30 даража бўлади.