Adliya vazirligi “Davlat hisobidan yuridik yordam ko‘rsatadigan advokatlarni jalb etish va ularga haq to‘lash tartibi to‘g‘risida nizomni tasdiqlash haqida”gi hukumat qarori loyihasini muhokamaga qo‘ydi.
Mazkur nizom “Davlat hisobidan yuridik yordam ko‘rsatish to‘g‘risida”gi qonunga muvofiq davlat hisobidan yuridik yordam ko‘rsatadigan advokatlarni jalb etish va advokatlar tomonidan jismoniy shaxslarga yuridik yordam ko‘rsatilganligi uchun xarajatlarni davlat hisobidan qoplash tartibi va miqdorlarini belgilaydi.
Davlat hisobidan yuridik yordam jismoniy shaxslarga fuqarolik ishlari bo‘yicha sudlarga va maʼmuriy sudlarga taalluqli bo‘lgan quyidagilar haqidagi ishlar bo‘yicha ko‘rsatiladi:
- ijtimoiy nafaqalar va moddiy yordam tayinlash hamda to‘lash to‘g‘risidagi;
- ishga tiklash haqidagi;
- ish haqini undirish to‘g‘risidagi;
- alimentlarni undirish haqidagi;
- uyga kiritish, turar joydan foydalanish huquqini yo‘qotgan deb topish va ko‘chirish to‘g‘risidagi;
- mehnatda mayib bo‘lganlik yoki sog‘liqning boshqacha tarzda shikastlanganligi, shuningdek, boquvchining vafot etganligi tufayli yetkazilgan zararning o‘rnini qoplash haqidagi;
- Fuqarolik kodeksining 991-moddasida nazarda tutilgan tartibda tergovga qadar tekshiruvni amalga oshiruvchi organlarning, surishtiruv, dastlabki tergov, prokuratura organlarining va sudning qonunga xilof harakatlari tufayli yetkazilgan zararning o‘rnini qoplash to‘g‘risidagi.
Maʼmuriy huquqbuzarlik sodir etgan kam taʼminlangan shaxslarga davlat hisobidan yuridik yordam ushbu shaxslar tomonidan maʼmuriy qamoq jazosi nazarda tutilgan huquqbuzarlik sodir etilgan hollarda ko‘rsatiladi.
Ruhiy holati buzilgan jismoniy shaxslarga psixiatriya yordami ko‘rsatilayotganda davlat hisobidan yuridik yordam:
- tashxis qo‘yish, davolash va reabilitatsiya qilish;
- tibbiy yo‘sindagi majburlov choralarini qo‘llash;
- jinoyat, fuqarolik ishlari va maʼmuriy huquqbuzarliklar to‘g‘risidagi ishlar bo‘yicha sud-psixiatriya ekspertizasini o‘tkazish chog‘ida ko‘rsatiladi.
Xotin-qizlar va erkaklarning teng huquqliligi buzilganligi to‘g‘risidagi ishlarni sudlarda ko‘rish chog‘ida davlat hisobidan yuridik yordam xotin-qizlar va erkaklar uchun teng huquq hamda imkoniyatlar kafolatlarini taʼminlashning quyidagi yo‘nalishlari bo‘yicha ko‘rsatiladi:
- davlat fuqarolik xizmati sohasida;
- saylov huquqlarini amalga oshirishda;
- iqtisodiy sohada hamda tadbirkorlik faoliyatida;
- mehnat munosabatlarida;
- ijtimoiy himoya sohasida;
- oilaviy munosabatlar hamda bolalar tarbiyasi sohasida;
- taʼlim, ilm-fan, madaniyat hamda sog‘liqni saqlash sohasida.
Agar shaxs gumon qilinuvchi, ayblanuvchi yoki sudlanuvchi bo‘lib qolsa, davlat hisobidan yuridik yordam Jinoyat-protsessual kodeksida nazarda tutilgan tartibda ko‘rsatiladi. Agar kam taʼminlangan shaxs mahkum bo‘lib qolgan taqdirda, davlat hisobidan yuridik yordam qonunchilikda belgilangan tartibda ko‘rsatiladi.
Eslatib o‘tamiz, yanvar oyida Advokatura faoliyatiga axborot-kommunikatsiya texnologiyalarini keng joriy etish maqsadida “Yuridik yordam” axborot tizimi ishga tushirilgandi. Tizim orqali respublikada faoliyat yuritayotgan advokatlar reyestri, ularning shaxsiy elektron kabineti yaratilib, advokatlar tomonidan elektron advokat orderini rasmiylashtirish, davlat organlari va tashkilotlariga advokatlik so‘rovlarini jo‘natish va arizalar berilishi mumkin.
Izoh (0)