Qoraqalpog‘iston Respublikasi Jo‘qorg‘i Kengesi raisi Amanbay Orinbayev Chimboy tumanini ijtimoiy-iqtisodiy rivojlantirish, fuqarolarga munosib turmush sharoitini yaratish bo‘yicha amalga oshirilayotgan ishlar va bu yo‘nalishda yo‘l qo‘yilgan kamchiliklar yuzasidan majlis o‘tkazdi.
Ma’lum qilinishicha, 2023-yil tuman dasturi doirasida 9117 yangi ish o‘rni yaratish belgilangan bo‘lsada, bu vazifa to‘liq bajarilmagan, yolg‘on maʼlumotlar va hisobatga qo‘shib yozishlar aniqlangan.
Chimboy tuman soliq inspeksiyasi boshlig‘i tomonidan o‘ziga biriktirilgan vazifalarga maʼsuliyatsizligi tufayli budjet tushumlarida ko‘plab kamchiliklar yuzaga kelgan.
Shuningdek, tumanda bir qator moliyaviy kamchiliklar ham aniqlangan, ichimlik suv, gaz va elektr energiyasi uchun qarzdorliklarni undirish to‘g‘ri yo‘lga qo‘yilmagan.
“Majlisda tuman iqtisodiyot va moliya bo‘limi boshlig‘i, tuman soliq bo‘limi boshlig‘i va tuman tibbiyot birlashmasi boshlig‘ini egallab turgan lavozimidan ozod qilish bo‘yicha topshiriq berildi”, — deyiladi xabarda.
Esatib o‘tamiz, 2-avgust kuni viloyatda prezident raisligida kambag‘allikni qisqartirish, aholi bandligini taʼminlash va tadbirkorlikni qo‘llab-quvvatlash orqali soliq bazasini kengaytirish bo‘yicha videoselektor yig‘ilishi bo‘lib o‘tgan edi. Unda davlat rahbari Bekobod, Bo‘ka, Qo‘shko‘pir, Shahrixon, Qonliko‘l, Taxtako‘pir, Chimboy, Mirzaobod, Bog‘ot, Ulug‘nor, Xo‘jayli, Shumanay, Mirzacho‘l, Do‘stlik, To‘raqo‘rg‘on tumanlari va Namangan shahar hokimlarining birinchi o‘rinbosarlarini lavozimidan ozod etgandi.
Izoh (0)