“To‘qimachilik sanoatini moliyaviy qo‘llab-quvvatlash bo‘yicha qo‘shimcha chora-tadbirlar to‘g‘risida”gi prezident farmoni qabul qilindi, deb xabar beradi “Norma”.
Hujjatga muvofiq, gazlama, trikotaj mato va tayyor tikuv-trikotaj mahsulotlarini eksport qiluvchi korxonalarni aylanma mablag‘lar bilan taʼminlash uchun Eksportni qo‘llab-quvvatlash jamg‘armasiga qo‘shimcha 50 million dollar ajratiladi.
Mablag‘lar Tiklanish va taraqqiyot jamg‘armasi tomonidan revolver kreditlash asosida 2026-yil 1-yanvarga qadar qaytarish sharti bilan yillik 4 foiz stavkada taqdim etiladi. Chora to‘qimachilik sanoati korxonalaridagi mavjud imkoniyatlarni to‘liq safarbar etish va ularning eksport salohiyatini yanada oshirishga qaratilgan.
Shuningdek, prezidentning 2023-yil 10-yanvardagi “Paxta-to‘qimachilik klasterlari faoliyatini qo‘llab-quvvatlash, to‘qimachilik va tikuv-trikotaj sanoatini tubdan isloh qilish hamda sohaning eksport salohiyatini yanada oshirish chora-tadbirlari to‘g‘risida”gi farmoniga tegishli o‘zgartirishlar kiritiladi.
Hujjat qonun hujjatlari maʼlumotlari milliy bazasida eʼlon qilingan va 2023-yil 4-sentabrdan kuchga kirdi.
Avvalroq O‘zbekistonda baliqchilik loyihalarini amalga oshirish uchun garovsiz kredit berilishi, O‘zbekistonda ixtiyoriy ravishda ko‘mir yoqilg‘isida ishlaydigan issiqxonalarga davlat tomonidan rag‘batlantirish paketi joriy qilinishi to‘g‘risida xabar berilgandi.