Хитой етакчиси Си Цзиньпин шу ҳафта Ҳиндистонда бўлиб ўтадиган G20 саммитида қатнашмаслиги ҳақидаги хабар Пекин Ғарб ва унинг иттифоқчиларидан ўзини узоқ тутаётгани ҳақидаги хавотирли тенденцияни тасдиқлади. Бу ҳақда Reuters агентлиги Хитойдаги хорижий дипломатларнинг кўрсатмаларига таяниб хабар бермоқда.
“Хитойда ишлаётган 10 дан ортиқ ғарбликлар Reuters агентлигига Хитойдаги маълумот манбаларига киришда дуч келаётган қийинчиликлар ортиб бораётгани ҳақида айтиб беришди”, деб ёзади нашр.
Масалан, Пекиндаги Ғарб расмийларининг хабар беришича, Хитой сиёсатини дунёга тушунтиришда муҳим рол ўйнайдиган Хитой расмийлари ёки ҳаттоки давлат таҳлил марказлари олимлари билан алоқага чиқиш камайган.
Баъзи дипломатларнинг хабар беришича, олий мартабали меҳмонларнинг ташрифларини режалаштириш, шунингдек, протоколлар тузиш ва оммавий ахборот воситаларига чиқишини таъминлаш тобора қийинлашиб бормоқда.
Аввалроқ Хитой ҳукумати 9—10 сентябрь кунлари бўлиб ўтадиган G20 йиғилишига борадиган Пекин делегациясига бош вазир Ли Цян раҳбарлик қилишини тасдиқлаган эди.
Тадбир, хусусан, Си Цзиньпиннинг АҚШ президенти Жо Байден билан учрашиши мумкин бўлган жой сифатида кўрилганди, аммо энди учрашувнинг навбатдаги эҳтимолий санаси ноябрь ойида Сан-Франсискода бўлиб ўтадиган Осиё-Тинч океани иқтисодий ҳамкорлиги саммити бўлиши кутилмоқда.
Изоҳ (0)