Vashington Pxenyanga Shimoliy Koreya Rossiyaga qurol yetkazib bersa, buning “oqibatlari” bilan tahdid qilmoqda. 5-sentabr kuni AQSH milliy xavfsizlik bo‘yicha maslahatchisi Jeyk Sallivan Shimoliy Koreya buning uchun xalqaro hamjamiyatga “katta tovon to‘laydi” deb ogohlantirdi.
Amerika rasmiysiga ko‘ra, Shimoliy Koreya yetakchisi Kim Chen In Rossiyaga qurol-yarog‘ yetkazib berish bo‘yicha davlat rahbarlari darajasida muzokaralar o‘tkazishi kutilmoqda.
Avvalroq New York Times gazetasi Kim Vladimir Putin bilan qurol-yarog‘ kelishuvini muhokama qilish uchun sentabr oyida Rossiyaga borishni rejalashtirayotgani haqida xabar bergandi. Nashrning yozishicha, uchrashuv Vladivostokda bo‘lib o‘tishi mumkin, u yerga Shimoliy Koreya yetakchisi zirhli poyezdda kelishi aytilmoqda. Kreml bu ma’lumotga izoh bermadi.
Jeyk Sallivan Rossiya mudofaa sanoati Ukrainaga qarshi urushda armiya ehtiyojlarini qondira olmayotgani uchun xorijdan o‘q-dorilar sotib olish yo‘llarini qidirayotganini eslatdi.
“Biz Shimoliy Koreyani o‘z majburiyatlarini bajarishga va Rossiyaga qurol yetkazib bermaslikka chaqirishda davom etamiz”, — dedi u.
Izoh (0)