Donetsk viloyati harbiy-fuqarolik maʼmuriyati rahbari Pavel Kirilenko ishdan bo‘shatildi. Ukraina prezidenti Vladimir Zelenskiyning tegishli farmoni davlat rahbari saytida e’lon qilindi.
5-sentabrdagi farmonda aytilishicha, Kirilenko o‘z arizasi tufayli ishdan olingan. Kirilenko bu lavozimda 2019-yildan beri ishlab kelayotgandi.
Prezident farmonida iste’fo sababi ko‘rsatilmagan. Biroq avvalroq “Xalq xizmatchisi” fraksiyasi rahbari Devid Araxamiya Kirilenko Monopoliyaga qarshi kurash qo‘mitasiga rahbarlik qilishi mumkinligini aytgandi. Qo‘mitaning avvalgi rahbari Olga Pishanskaya iste’foga chiqish to‘g‘risida ariza yozgan, u Davlat mulk jamg‘armasiga rahbarlik qilishi mumkin, deya xabar berdi Ukrainaning New Voice nashri.
Bunga qadar Oliy Rada Zelenskiyning Ukraina Mudofaa vazirligi rahbari Aleksiy Reznikovni iste’foga chiqarish haqidagi taklifini qo‘llab-quvvatlagan edi. Reznikovni parlamentda olqishlar bilan kuzatishdi.
Mudofaa vazirligiga mamlakat Davlat mulki jamg‘armasining sobiq rahbari Rustem Umerov rahbarlik qiladi.
Umerov haqida
Vazirlikka Umerovning nomzodini Zelenskiy ilgari surdi. Uning o‘zi allaqachon Ukraina Davlat mulki jamg‘armasi rahbari lavozimidan iste’foga chiqish haqida ariza bergan. Oliy Rada uni navbatdagi yalpi majlisda ko‘rib chiqadi. Umerov — kelib chiqishi qrim-tatar ukrainalik tadbirkor. Uning oilasi 1944-yilda Qrimdan Markaziy Osiyoga ko‘chirib yuborilgan. Umerov 1982-yil Samarqand viloyatining Bulung‘ur tumanida tug‘ilgan. 1980-yillar oxirida qrim-tatarlarni vataniga qaytarish boshlanganida, Umerovlar oilasi Qrimga qaytishga muvaffaq bo‘lgan.
U “Qrim tatarlari jamiyati” jamoat tashkilotining asoschilaridan biri, shuningdek, qrim-tatar xalqi yetakchisi Mustafo Jemilevning maslahatchisi bo‘lgan. 2019 — 2022-yillarda Umerov Oliy Radaning “Ovoz” fraksiyasidan deputat bo‘lgan, keyin esa Davlat mulki jamg‘armasini boshqargan.
Izoh (0)