Turkiyada 5-sentabr kuni kechqurun kuchli yomg‘irlar bir vaqtning o‘zida bir nechta viloyatlarni qamrab oldi. Istanbulda esa tabiiy ofatdan eng ko‘p Bashakshehir tumani zarar ko‘rdi. U yerdagi kanal o‘zanidan toshib, bir qancha mashinalarni sel olib ketdi. Yomg‘ir oqibatida metro bekati va kutubxonani ham suv bosdi.
Guvohlar ijtimoiy tarmoqlarda loyqa suv mashinalarni oqizayotgani va binolarni suv bosgani aks etgan videolarni joyladi.
Qutqaruvchilar Milliy kutubxonadan o‘quvchilar va xodimlarni evakuatsiya qilib, tuman hokimligi binosiga olib ketdi.
Istanbul rasmiylari suv toshqini oqibatida halok bo‘lganlar ikki kishiga yetganini ma’lum qildi. Shahar hokimi Ekrem Imomo‘g‘lu tez orada favqulodda bayonot bilan chiqishni rejalashtirmoqda. Uning so‘zlariga ko‘ra, rasmiylar bunday yomg‘irni kutmagan, ba’zi hududlarda bir kvadrat metrga bir vaqtda 150 kilogramm yomg‘ir yog‘gan.
Tabiiy ofat oqibatlarini bartaraf etishda 2,1 mingdan ortiq xodim ishlamoqda.
Istanbul aeroporti yaqinidagi tunnel ham suv ostida qolgan, bu esa yo‘lovchilarga aeroportga yetib borishga to‘sqinlik qilmoqda.
Izoh (0)