Вашингтон Пхеньян га Шимолий Корея Россияга қурол етказиб берса, бунинг “оқибатлари” билан таҳдид қилмоқда. 5 сентябрь куни АҚШ миллий хавфсизлик бўйича маслаҳатчиси Жейк Салливан Шимолий Корея бунинг учун халқаро ҳамжамиятга “катта товон тўлайди” деб огоҳлантирди.
Америка расмийсига кўра, Шимолий Корея етакчиси Ким Чен Ин Россияга қурол-яроғ етказиб бериш бўйича давлат раҳбарлари даражасида музокаралар ўтказиши кутилмоқда.
Аввалроқ New York Times газетаси Ким Владимир Путин билан қурол-яроғ келишувини муҳокама қилиш учун сентябрь ойида Россияга боришни режалаштираётгани ҳақида хабар берганди. Нашрнинг ёзишича, учрашув Владивостокда бўлиб ўтиши мумкин, у ерга Шимолий Корея етакчиси зирҳли поездда келиши айтилмоқда. Кремль бу маълумотга изоҳ бермади.
Жейк Салливан Россия мудофаа саноати Украинага қарши урушда армия эҳтиёжларини қондира олмаётгани учун хориждан ўқ-дорилар сотиб олиш йўлларини қидираётганини эслатди.
“Биз Шимолий Кореяни ўз мажбуриятларини бажаришга ва Россияга қурол етказиб бермасликка чақиришда давом этамиз”, — деди у.
Изоҳ (0)