Angliyaning kattaligi bo‘yicha ikkinchi shahri bankrotlik uchun ariza topshirdi

Birmingem shahar kengashi 5-sentabr seshanba kuni bankrotlik to‘g‘risida ariza berganini e’lon qildi.

Shu kundan boshlab shahar ijtimoiy sug‘urta majburiyatlaridan tashqari, barcha to‘lovlar va xarajatlarni to‘xtatadi.

Birmingem aholisining ko‘pligi bo‘yicha Angliyadagi ikkinchi yirik shahar (1 milliondan ortiq kishiga ega).

Bankrotlikning asosiy sababi kasaba uyushmalarining da’vosi asosida chiqarilgan sud qarorlari bo‘ldi. Kasaba uyushmalari Birmingem shahri rahbariyatini shahardagi ayollar hali ham erkaklarnikiga qaraganda kamroq maosh olishida ayblab keladi. 

Sud qarorlari asosida shahar o‘n yil davomida tovon puli to‘ladi. Biroq hisob-kitoblar oyiga 5-14 million funt sterlingga o‘sib bormoqda va yillar davomida to‘plangan to‘lanmagan tovonning umumiy miqdori 650-760 million funt sterlingga baholanmoqda.

Rasmiylar shaharda bunday pul yo‘qligini ma’lum qilmoqda. Bu yildagi budjet taqchilligi allaqachon 8 million funt sterlingga baholangan.