Xitoy Yaponiyadan dengiz mahsulotlari sotib olishni taqiqlaganidan keyin Yaponiya hukumati mahalliy baliqchilik sanoatini qo‘llab-quvvatlash uchun 20,7 milliard iyen (141 million dollar) miqdorida yangi yordam paketini e’lon qildi. Bu haqda DW xabar bermoqda.
Pekin bunday taqiqni Yaponiya 24-avgust kuni Fukusima atom elektr stansiyasidan tozalangan radioaktivli suvni Tinch okeaniga to‘kishni boshlaganidan so‘ng joriy qildi. AES suvi oqizilishidan oldin Xitoy yapon baliqlari uchun eng yirik eksport joyi edi, jami baliqlarning 22,5 foizi mamlakatga jo‘natilgan. 20 foizlik ikkinchi yirik bozor — Gonkong ham Fukusima va boshqa to‘qqiz prefekturadan dengiz mahsulotlari importini to‘xtatdi.
Yaponiya bosh vaziri Fumio Kisida yangi mablag‘lar dengiz mahsulotlari biznesiga yordam berish va yapon mahsulotlari obro‘siga putur yetkazilishiga qarshi kurashish uchun ajratilgan 80 milliard iyenga qo‘shimcha bo‘lishini aytdi.
“Biz Yaponiya baliqchilik sanoatini har qanday holatda ham himoya qilamiz”, — dedi Kisida.
Yangi yordam paketi yapon dengiz mahsulotlari uchun bozorlar topishga ishlatiladi. Rasmiylar Tayvan, AQSH, Yevropa, Yaqin Sharq va Janubi-Sharqiy Osiyodagi ba’zi mamlakatlarda yangi eksport yo‘nalishlarini rivojlantirishni rejalashtirgan.
Taqiqlar Yaponiya dengiz mahsulotlari sanoatiga jiddiy zarba bo‘lib, Fukusimadan uzoqda joylashgan shimoliy Xokkaydo orolida ham mahsulotlarning narxi va savdosiga ta’sir ko‘rsatdi.
Yaponiya hukumati aholini AES suvi to‘kilgan okeandagi mahsulotlar zararsiz ekaniga ishontirishga urinmoqda. O‘tgan hafta bosh vaziri Fumio Kisida va bir qancha vazirlar Fukusima AESdagi suv okeanga to‘kilgandan keyin tutilgan baliqni omma oldida iste’mol qildi.
Xitoy Fukusima AESdagi suvni okeanga to‘kishga qarshi
2011-yildagi zilzila va sunami oqibatida yuzaga kelgan avariyadan so‘ng Fukusima AES hududida shikastlangan reaktorlarni sovitishda foydalaniladigan 1 000 dan ortiq suv rezervuarlari to‘planib qolgan, bu taxminan 1,3 million kub metr suvni tashkil etadi. Yaponiya rasmiylariga ko‘ra, 2024-yil boshida barcha rezervuarlar to‘lib bo‘ladi.
Ularda saqlanadigan suv yaxshilab tozalangan, ammo unda hali ham vodorodning radioaktiv izotopi — tritiy bor, bu modda izsiz yo‘qolib ketmaydi. Yaponiya hukumati bu suvni dengizga to‘kish zarurligini aytib, bu dunyoning boshqa atom elektr stansiyalarida ham odatiy hol ekanini ta’kidlamoqda.
Xitoy AESdagi suvni okeanga to‘kishga qat’iyan qarshi. Xitoy elchisi bu dasturni noto‘g‘ri deb atadi hamda Yaponiya dasturni to‘xtatib, birinchi navbatda qo‘shni davlatlar bilan maslahatlashuvlar o‘tkazishi kerakligini aytdi. 4-iyul kuni Atom energiyasi bo‘yicha xalqaro agentlik (MAGATE) rahbari Rafael Grossi Yaponiyaga tashrif buyurdi va suvni okeanga to‘kish qarorini ma’qulladi. Uning ta’kidlashicha, oqindi suv sifatiga, baliqlarga va yaqin atrofdagi manzilgohlarga katta ta’sir qilmaydi.
24-avgust kuni Yaponiyaning Tokyo Electric Power (TEPCO) kompaniyasi Fukusima-1 atom elektr stansiyasidagi tozalangan radioaktiv suvni okeanga to‘kishni boshladi.
Izoh (0)