Хитой Япониядан денгиз маҳсулотлари сотиб олишни тақиқлаганидан кейин Япония ҳукумати маҳаллий балиқчилик саноатини қўллаб-қувватлаш учун 20,7 миллиард иен (141 миллион доллар) миқдорида янги ёрдам пакетини эълон қилди. Бу ҳақда DW хабар бермоқда.
Пекин бундай тақиқни Япония 24 август куни Фукусима атом электр станциясидан тозаланган радиоактивли сувни Тинч океанига тўкишни бошлаганидан сўнг жорий қилди. АЭС суви оқизилишидан олдин Хитой япон балиқлари учун энг йирик экспорт жойи эди, жами балиқларнинг 22,5 фоизи мамлакатга жўнатилган. 20 фоизлик иккинчи йирик бозор — Гонконг ҳам Фукусима ва бошқа тўққиз префектурадан денгиз маҳсулотлари импортини тўхтатди.
Япония бош вазири Фумио Кисида янги маблағлар денгиз маҳсулотлари бизнесига ёрдам бериш ва япон маҳсулотлари обрўсига путур етказилишига қарши курашиш учун ажратилган 80 миллиард иенга қўшимча бўлишини айтди.
“Биз Япония балиқчилик саноатини ҳар қандай ҳолатда ҳам ҳимоя қиламиз”, — деди Кисида.
Янги ёрдам пакети япон денгиз маҳсулотлари учун бозорлар топишга ишлатилади. Расмийлар Тайван, АҚШ, Европа, Яқин Шарқ ва Жануби-Шарқий Осиёдаги баъзи мамлакатларда янги экспорт йўналишларини ривожлантиришни режалаштирган.
Тақиқлар Япония денгиз маҳсулотлари саноатига жиддий зарба бўлиб, Фукусимадан узоқда жойлашган шимолий Хоккайдо оролида ҳам маҳсулотларнинг нархи ва савдосига таъсир кўрсатди.
Япония ҳукумати аҳолини АЭС суви тўкилган океандаги маҳсулотлар зарарсиз эканига ишонтиришга уринмоқда. Ўтган ҳафта бош вазири Фумио Кисида ва бир қанча вазирлар Фукусима АЭСдаги сув океанга тўкилгандан кейин тутилган балиқни омма олдида истеъмол қилди.
Хитой Фукусима АЭСдаги сувни океанга тўкишга қарши
2011 йилдаги зилзила ва сунами оқибатида юзага келган авариядан сўнг Фукусима АЭС ҳудудида шикастланган реакторларни совитишда фойдаланиладиган 1 000 дан ортиқ сув резервуарлари тўпланиб қолган, бу тахминан 1,3 миллион куб метр сувни ташкил этади. Япония расмийларига кўра, 2024 йил бошида барча резервуарлар тўлиб бўлади.
Уларда сақланадиган сув яхшилаб тозаланган, аммо унда ҳали ҳам водороднинг радиоактив изотопи — тритий бор, бу модда изсиз йўқолиб кетмайди. Япония ҳукумати бу сувни денгизга тўкиш зарурлигини айтиб, бу дунёнинг бошқа атом электр станцияларида ҳам одатий ҳол эканини таъкидламоқда.
Хитой АЭСдаги сувни океанга тўкишга қатъиян қарши. Хитой элчиси бу дастурни нотўғри деб атади ҳамда Япония дастурни тўхтатиб, биринчи навбатда қўшни давлатлар билан маслаҳатлашувлар ўтказиши кераклигини айтди. 4 июль куни Атом энергияси бўйича халқаро агентлик (МАGATE) раҳбари Рафаэл Grossи Японияга ташриф буюрди ва сувни океанга тўкиш қарорини маъқуллади. Унинг таъкидлашича, оқинди сув сифатига, балиқларга ва яқин атрофдаги манзилгоҳларга катта таъсир қилмайди.
24 август куни Япониянинг Tokyo Electric Power (ТEPCО) компанияси Фукусима-1 атом электр станциясидаги тозаланган радиоактив сувни океанга тўкишни бошлади.
Изоҳ (0)