Yaponiya bosh vaziri Fumio Kisida va bir qancha vazirlar Fukusima AESdagi suv okeanga to‘kilgandan keyin tutilgan baliqni omma oldida iste’mol qildi. Amaldorlar shu tariqa ular xavfsiz ekanini ko‘rsatdi. Bu haqda Nikkei xabar berdi.
Yaponiyaning Tokyo Electric Power (TEPCO) kompaniyasi Fukusima-1 atom elektr stansiyasidagi tozalangan radioaktiv suvni okeanga to‘kishni boshlagan. Xitoy mazkur jarayon sababli yapon dengiz mahsulotlari importiga taqiq kiritgan.
Ta’kidlanishicha, Fumio Kisida kambala, olabug‘a baliqlari, sakkizoyoqdan tayyorlangan sashimi (yapon taomi), shuningdek, guruch iste’mol qilgan. Yaponiya hukumati Fukusima yaqinida ovlangan dengiz mahsulotlari xavfsizligi haqida “aholi va xorijdagi odamlarni xabardor qilish kerak”ligini aytmoqda.
Bosh vazir dengiz mahsulotlarini tatib ko‘rayotgani aks etgan videoda Kisida “mazali” deganini ko‘rish mumkin.
Xitoy Yaponiya dengiz mahsulotlarini importini taqiqladi
Xitoy Fukusima AESdagi tozalangan radioaktiv suv okeanga to‘kilishi fonida Yaponiyaning barcha dengiz mahsulotlari importini taqiqladi. Tashqi ishlar vazirligining taʼkidlashicha, Xitoy suvni to‘kish qarorini “qat’iy qoralaydi” va Yaponiyadan “bu noto‘g‘ri harakatni to‘xtatishni” talab qiladi.
“Yaponiya xudbinlik tufayli o‘z xalqiga va butun dunyoga qo‘shimcha zarar keltirmasligi kerak”, — deyiladi TIV xabarida.
Xitoy Fukusima AESdagi suvni okeanga to‘kishga qarshi
2011-yildagi zilzila va sunami oqibatida yuzaga kelgan avariyadan so‘ng Fukusima AES hududida shikastlangan reaktorlarni sovitishda foydalaniladigan 1 000 dan ortiq suv rezervuarlari to‘planib qolgan, bu taxminan 1,3 million kub metr suvni tashkil etadi. Yaponiya rasmiylariga ko‘ra, 2024-yil boshida barcha rezervuarlar to‘lib bo‘ladi.
Ularda saqlanadigan suv yaxshilab tozalangan, ammo unda hali ham vodorodning radioaktiv izotopi — tritiy bor, bu modda izsiz yo‘qolib ketmaydi. Yaponiya hukumati bu suvni dengizga to‘kish zarurligini aytib, bu dunyoning boshqa atom elektr stansiyalarida ham odatiy hol ekanini ta’kidlamoqda.
Xitoy AESdagi suvni okeanga to‘kishga qat’iyan qarshi. Xitoy elchisi bu dasturni noto‘g‘ri deb atadi hamda Yaponiya dasturni to‘xtatib, birinchi navbatda qo‘shni davlatlar bilan maslahatlashuvlar o‘tkazishi kerakligini aytdi. 4-iyul kuni Atom energiyasi bo‘yicha xalqaro agentlik (MAGATE) rahbari Rafael Grossi Yaponiyaga tashrif buyurdi va suvni okeanga to‘kish qarorini ma’qulladi. Uning ta’kidlashicha, oqindi suv sifatiga, baliqlarga va yaqin atrofdagi manzilgohlarga katta ta’sir qilmaydi.
Izoh (0)