Yaponiyaning Tokyo Electric Power (TEPCO) kompaniyasi Fukusima-1 atom elektr stansiyasidagi suvni okeanga to‘kishni boshladi. Jarayon jonli efirga uzatilmoqda, deb xabar berdi Associated Press.
Tozalangan suv qirg‘oqdan bir kilometr masofada suvosti tunnel orqali okeanga to‘kilmoqda. Kuniga 460 tonna suv chiqariladi. AESdagi suvning har tonnasi 1,2 ming tonna toza dengiz suvi bilan suyultiriladi. Dastlabki 17 kun ichida 8 tonnadan kamroq suv chiqariladi.
Suvni to‘kish rejaladagidek boshlandi — shu hafta boshida rasmiylar qulay ob-havo sharoiti hisobga olinsa, jarayon 24-avgust kuni boshlanishini ma’lum qilgandi.
Xitoy Fukusima AESdagi suvni okeanga to‘kishga qarshi
2011-yildagi zilzila va sunami oqibatida yuzaga kelgan avariyadan so‘ng Fukusima AES hududida shikastlangan reaktorlarni sovutishda foydalaniladigan 1 000 dan ortiq suv rezervuarlari to‘planib qolgan, bu taxminan 1,3 million kub metr suvni tashkil etadi. Yaponiya rasmiylariga ko‘ra, 2024-yil boshida barcha rezervuarlar to‘lib bo‘ladi.
Ularda saqlanadigan suv yaxshilab tozalangan, ammo unda hali ham vodorodning radioaktiv izotopi — tritiy bor, bu modda izsiz yo‘qolib ketmaydi. Yaponiya hukumati bu suvni dengizga to‘kish zarurligini aytib, bu dunyoning boshqa atom elektr stansiyalarida ham odatiy hol ekanini ta’kidlamoqda.
Xitoy AESdagi suvni okeanga to‘kishga qat’iyan qarshi. Xitoy elchisi bu dasturni noto‘g‘ri deb atadi hamda Yaponiya dasturni to‘xtatib, birinchi navbatda qo‘shni davlatlar bilan maslahatlashuvlar o‘tkazishi kerakligini aytdi. 4-iyul kuni Atom energiyasi bo‘yicha xalqaro agentlik (MAGATE) rahbari Rafael Grossi Yaponiyaga tashrif buyurdi va suvni okeanga to‘kish qarorini ma’qulladi. Uning ta’kidlashicha, oqindi suv sifatiga, baliqlarga va yaqin atrofdagi manzilgohlarga katta ta’sir qilmaydi.
Izoh (0)