Rossiyada Yevgeniy Prigojinning isyonidan keyin hibsga olingani aytilayotgan general Sergey Surovikin ozod etildi. Bu haqda The New York Times gazetasi amerikalik ikki amaldor va Rossiya Mudofaa vazirligiga yaqin manbaga asoslanib xabar bermoqda.
Nashrning Vashingtondagi suhbatdoshlariga ko‘ra, Surovikin qo‘yib yuborilganiga qaramay, uning uchun, xususan, harakatlanishda qandaydir cheklovlar bor-yo‘qligi noma’lum.
Rossiya Mudofaa vazirligiga yaqin manbaning taʼkidlashicha, general o‘z unvonini saqlab qolgan va “texnik jihatdan” hali ham Qurolli kuchlarda faol ofitser bo‘lib turibdi, ammo u endi “mansab istiqboli”ga ega emas. Nashr suhbatdoshi, shuningdek, Surovikin 23-avgust kuni Yevgeniy Prigojinning aviahalokatidan bir necha kun o‘tib qo‘yib yuborilganini aytdi.
Surovikin ozod etilgani haqida 4-sentabr kuni jurnalist Kseniya Sobchak ma’lum qilgandi. U o‘zining Telegram kanalida general tasvirlangan suratni joylashtirdi.
“General Sergey Surovikin chiqdi. Tirik, sog‘lom, uyda, oilasi bilan birga, Moskvada”, — deb yozgan Sobchak.
Sochida Rossiya — Turkiya muzokaralaridan so‘ng o‘tkazilgan brifingda mudofaa vaziri Sergey Shoygudan Surovikinga nisbatan tergov olib borilyaptimi, deb so‘raldi. U ushbu savolga javob bermadi. Jurnalist Farida Rustamova yarim soatdan keyin Sobchakning kanalida generalning surati paydo bo‘lganiga e’tibor qaratdi.
Sergey Surovikin Rossiya Aerokosmik kuchlari bosh qo‘mondoni lavozimida ishlagan. 2022-yil oktabr oyida u Ukrainadagi Rossiya kuchlarining qo‘shma guruhi rahbari bo‘ldi, shundan so‘ng Rossiya armiyasi Ukrainaning energetika va fuqarolik infratuzilmasiga qator yirik raketa zarbalarini berdi. Surovikin 2023-yil yanvarigacha Ukrainadagi rus qo‘shinlarining guruhlanishiga rahbarlik qilgan.
Surovikin hibsga olingani haqidagi ma’lumotlar “Vagner” asoschisi Yevgeniy Prigojinning isyonidan ko‘p o‘tmay paydo bo‘ldi. Isyon paytida Sergey Surovikinning murojaati tarqaldi, unda “vagnerchi”larni to‘xtatish va “muammolarni tinch yo‘l bilan hal qilish”ga chaqiriladi. Amerika razvedka xizmatlariga ko‘ra, Surovikin “Vagner” asoschisi isyon tayyorlayotganini oldindan bilgan. Rasmiy ravishda, generalning hibsga olingani haqidagi ma’lumotlar tasdiqlanmadi, ammo o‘shandan beri u jamoat joylarida ko‘rinish bermadi.
Izoh (0)