O‘zbekiston prezidenti yordamchisi Saida Mirziyoyeva o‘zining Telegram’dagi kanali orqali 4-sentabr kuni UNESCO’ning Parijdagi Bosh qarorgohida “Abu Rayhon Beruniy. Geografik va intellektual sayohatlar” ko‘rgazmasi ochilganini ma’lum qildi.
Qayd etilishicha, mazkur loyiha buyuk alloma va mutafakkir tavalludining 1050-yilligiga bag‘ishlangan.
Tashrif buyuruvchilar vizual installyatsiyalar yordamida Abu Rayhon Beruniyning hayoti va ijodi, kashfiyot va izlanishlari haqida maʼlumot olishlari mumkin. Ekspozitsiyada allomaning Fransiya milliy kutubxonasi fondidan yig‘ilgan qo‘lyozmalariga alohida joy ajratilgan.
“O‘ylaymanki, ushbu loyiha Yevropa jamoatchiligida katta qiziqish uyg‘otib, buyuk allomalarimiz merosi bilan faxrlanadigan o‘zbek zamini haqidagi tasavvurlarini yanada boyitadi.
Shu o‘rinda O‘zbekiston UNESCO Bosh konferensiyasining 43-sessiyasini 2025-yilda Samarqandda o‘tkazishga tayyorligini mamnuniyat bilan maʼlum qilaman! Agar ushbu taklif maʼqullansa, bu tarixiy voqea UNESCO sessiyalarini faqat Parijda chaqirish bo‘yicha 40 yildan oshiq davom etgan anʼanani o‘zgartira oladi”, — deb yozadi Saida Mirziyoyeva.
Avgust oxirlarida “Abu Rayhon Beruniy nomidagi UNESCO — O‘zbekiston xalqaro mukofotini ta’sis etishni qo‘llab-quvvatlash to‘g‘risida” prezident qarori e’lon qilingandi. Qarorga muvofiq, UNESCO bilan hamkorlikda Abu Rayhon Beruniy nomidagi UNESCO – O‘zbekiston xalqaro mukofotini ta’sis etish hamda Parij shahridagi UNESCO bosh qarorgohida 2023-yil 4–8-sentabr kunlari Abu Rayhon Beruniy hayoti va ijodiga bag‘ishlangan xalqaro ko‘rgazma va tadbirlarni yuqori saviyada o‘tkazish belgilangan.
Izoh (0)