“Abu Rayhon Beruniy nomidagi UNESCO — O‘zbekiston xalqaro mukofotini ta’sis etishni qo‘llab-quvvatlash to‘g‘risida” prezident qarori e’lon qilindi. Bu haqda O‘zA xabar berdi.
Qarorga muvofiq, UNESCO bilan hamkorlikda Abu Rayhon Beruniy nomidagi UNESCO – O‘zbekiston xalqaro mukofotini ta’sis etish hamda Parij shahridagi UNESCO bosh qarorgohida 2023-yil 4–8-sentabr kunlari Abu Rayhon Beruniy hayoti va ijodiga bag‘ishlangan xalqaro ko‘rgazma va tadbirlarni yuqori saviyada o‘tkazish belgilandi.
Prezident 2022-yilda “Buyuk mutafakkir va qomusiy olim Abu Rayhon Beruniy tavalludining 1050-yilligini xalqaro miqyosda keng nishonlash to‘g‘risida”gi qarorni imzolagandi. Qarorga asosan:
- 2022–2023-yillarda Abu Rayhon Beruniy tavalludining 1050 yilligi UNESCO shafeligida xalqaro miqyosda keng nishonlanishi;
- Qoraqalpog‘istonning Beruniy tumanida 2023-yil yakunigacha Abu Rayhon Beruniy majmuasi quriladi va uning hududida ilmiy-ma’rifiy, madaniy va dam olish hamda turizm obyektlari faoliyati tashkil qilinishi;
- umumiy o‘rta ta’lim tashkilotlari, akademik litseylar va kasb-hunar maktablari o‘quvchilari o‘rtasida Xorazm viloyatida tegishli fan bo‘yicha Abu Rayhon Beruniy nomidagi xalqaro fan olimpiadasi o‘tkazilishi;
- Abu Rayhon Beruniy nomidagi xalqaro mukofot ta’sis etilishi;
- Beruniy hayoti va merosini tadqiq etish bo‘yicha ilmiy-tadqiqot ishlariga davlat buyurtmasi talablariga muvofiq ilmiy loyihalar tanlovi e’lon qilinishi;
- Toshkent shahrida Abu Rayhon Beruniy tavalludining 1050 yilligiga bag‘ishlangan xalqaro anjuman o‘tkazilishi;
- 2022–2023-yillarda Abu Rayhon Beruniy hayoti va ilmiy-ma’rifiy faoliyatiga bag‘ishlangan badiiy, multiplikatsion va to‘liq metrajli hujjatli filmlar, ko‘p qismli teleserial yaratiladi va xorijiy mamlakatlarda namoyish qilinishi;
- Badiiy akademiya va “Hunarmand” uyushmasi 2022–2023-yillarda respublika bo‘ylab Abu Rayhon Beruniy hayoti va ilmiy-ma’rifiy faoliyatiga bag‘ishlangan tasviriy san’at asarlari, miniatyuralar, xalq amaliy san’ati namunalari hamda fotosuratlar ko‘rgazmalarini tashkil etilishi belgilangandi.
Izoh (0)