O‘zbekiston Iqtisodiy hamkorlik tashkiloti mamlakatlari Turizm vazirlarining IV yig‘ilishiga raislik qildi. Tadbir doirasida Shahrisabz shahri 2024-yil IHT turizm poytaxti sifatida e’lon qilindi, deb “Daryo”ga xabar bermoqda Turizm va madaniy meros vazirligi matbuot xizmati.
Iqtisodiy hamkorlik tashkiloti (IHT)ga a’zo davlatlar Turizm vazirlarining IV yig‘ilishi onlayn formatda bo‘lib o‘tdi. Tadbir IHTda 2022 yil – o‘zaro aloqalarni mustahkamlash yili konsepsiyasiga muvofiq O‘zbekiston raisligida o‘tkazildi. Yig‘ilishda tashkilotga a’zo davlatlarning turizm idoralari rahbarlari va IHT Madaniyat instituti prezidenti ishtirok etdi. Tadbirga O‘zbekiston bosh vaziri o‘rinbosari – turizm va madaniy meros vaziri Aziz Abduhakimov raislik qildi.
Ma’lumot uchun, Iqtisodiy hamkorlik tashkilotiga O‘zbekiston, Turkmaniston, Turkiya, Eron, Tojikiston, Pokiston, Qirg‘iziston, Qozog‘iston va Ozarbayjon mamlakatlari kiradi. IV yig‘ilish kun tartibidan “IHT mintaqasida COVID-19 pandemiyasidan keyin turizm sohasini jadal tiklash, xavfsiz va barqaror rivojlantirish bo‘yicha “Yo‘l xaritasi”, “IHT turizm poytaxti” nomzodlari, “ECO Vision 2025” mandatlari bo‘yicha amalga oshirilgan ishlar taqdimoti hamda IHTga a’zo davlatlarning “Samarqand deklaratsiyasi” o‘rin oldi.
Yig‘ilish doirasida O‘zbekiston tomonidan ilgari surilgan qator tashabbus va hujjatlar tasdiqlandi. Bular:
1. O‘zbekiston prezidenti tomonidan 28-noyabr kuni Ashxobod shahrida o‘tgan Iqtisodiy hamkorlik tashkilotining XV sammiti doirasida ilgari surilgan tashabbusga ko‘ra, “IHT mintaqasida COVID-19 dan keyin turizmni jadal tiklash, xavfsiz va barqaror rivojlantirish “Yo‘l xaritasi” tasdiqlandi.
2. IHTga a’zo davlatlar boy tarixiy va madaniy merosini e’tirof etish, turizm sohasining iqtisodiy va barqaror rivojlanish, xalqlar o‘rtasidagi hamjihatlikni ta’minlashda asosiy omil sifatida ta’kidlash, a’zo davlatlar tomonidan amalga oshirilgan ishlar va pirovard maqsadlarni belgilovchi “Samarqand deklaratsiyasi” tasdiqlandi.
3. Tashkilot a’zolari tomonidan 2000 yillik tarixga ega, UNESCO Butunjahon merosi ro‘yxatiga kiritilgan Shahrisabz shahri 2024-yilda IHT turizm poytaxti sifatida ma’qullandi.
“Barcha yurtdoshlarimizni Shahrisabz shahri 2024-yilda IHT turizm poytaxti deya e’lon qilingani bilan tabriklaymiz! Bu qarorning qabul qilinishida O‘zbekistonda turizm va madaniy meros sohasi rivoji yo‘lida amalga oshirilayotgan islohotlar, Shahrisabz shahrining boy tarixi va madaniy merosi, Ipak yo‘lida turizmning rivojlanishidagi o‘rni va sohani barqaror rivojlantirish salohiyati inobatga olindi. Zero, Shahrisabz 2000 yillik tarixga ega bo‘lib, UNESCO ning Butunjahon merosi reprezentativ ro‘yxatiga kiritilgan”, — dedi Aziz Abduhakimov.
O‘z navbatida, Shahrisabzning ushbu maqomni olishini keng miqyosda nishonlash ko‘zda tutilgan. Qolaversa, shaharda va butun Qashqadaryo viloyatida turizm infratuzilmasini yaxshilash, ekoturizm, etnoturizm va boshqa yo‘nalishlarda salohiyatni yuksaltirish, hududning nomoddiy merosini keng ochib beruvchi madaniy tadbirlar, turizm tadbirkorligi, shu jumladan, yoshlarning faolligini oshirish bo‘yicha alohida dastur amalga oshirilishi ko‘zda tutilgan.
Tadbir yakunida IHTga a’zo davlatlar delegatsiyalari rahbarlari tomonidan O‘zbekiston raisligida ilgari surilgan takliflar va qabul qilingan hujjatlar turizm sohasidagi xalqaro hamkorlikni yangi pog‘onaga olib chiqishiga ishonch bildirildi.
Izoh (0)