21-avgustdan boshlab O‘zbekiston musulmonlari idorasi hamda Din ishlari bo‘yicha qo‘mita hamkorligida Buxoro viloyatida o‘tkaziladigan ma’naviy-ma’rifiy targ‘ibot tadbirlari boshlandi.
Din ishlari bo‘yicha qo‘mitaning ma’lum qilishicha, “Jaholatga qarshi ma’rifat” shiori ostida bo‘lib o‘tayotgan ma’naviy-ma’rifiy targ‘ibot tadbirlari mamlakat bo‘ylab keng qamrovda olib borilmoqda.
21-avgustdan boshlab Respublika ishchi guruhi tomonidan Buxoro viloyati bo‘ylab korxona-tashkilotlarda, mahalla va bozorlarda, shuningdek, maktab o‘quvchilarining ota-onalari, uyushmagan yoshlar hamda xotin-qizlar bilan targ‘ibot tadbirlari tashkil etiladi.
Buxoro shahar hokimligi matbuot xizmatining bildirishicha, ishchi guruh Din ishlari bo‘yicha qo‘mita, Xalqaro islom akademiyasi, Musulmonlar idorasi va boshqa bir qancha mas’ul tashkilot vakillaridan iborat.
Targ‘ibot tadbirlari yosh avlodni milliy vatanparvarlik ruhida tarbiyalash, jinoyatchilikni oldini olish, insonlarda dahldorlik hissini yuksaltirish, yoshlarni turli g‘oyaviy tahdidlardan asrash, ayolning oila va farzand tarbiyasidagi o‘rnini mustahkamlash, ma’rifatli millat tarbiyalashda ota-onaning roli kabi qator mavzularda o‘tkazilmoqda.
Viloyat hokimligi matbuot xizmatining xabar qilishicha, Mir Arab oliy madrasasida o‘tkazilgan tadbirga Respublika bo‘yicha barcha viloyatlarda faoliyat yuritib kelayotgan 219 ta tuman, shahar bosh imom-xatiblari tashrif buyurdi.
Targ‘ibot tadbirlarining asosiy qismi Yoshlar markazi binosida tashkil etildi. Unda shaharda faoliyat olib borayotgan davlat idoralari, korxona va tashkilot rahbar-xodimlari, mahallalar beshligi, sog‘liqni saqlash sohasi vakillari, maktabgacha va umum ta’lim maktablari direktorlari ishtirok etdi.
Izoh (0)