Surxondaryo viloyati hokimi Ulug‘bek Qosimov Jarqo‘rg‘on tumani hokimining ikki o‘rinbosarini ishdan olish bo‘yicha topshiriq berdi. Bir nechta mansabdorga intizomiy jazo qo‘lladi. Bu haqda “Daryo”ga hokimlik axborot xizmati xabar berdi.
Ta’kidlanishicha, bu haqda viloyat hokimining tadbirkorlar uchun navbatdagi qabulida ma’lum qilingan.
Ulug‘bek Qosimov navbatdagi onlayn tadbirkorlar qabulini o‘tkazdi. Qabul avvalida ijro intizomi, prezident va hukumat qarorlari, topshiriqlari, jismoniy va yuridik shaxslarning murojaatlari ijrosi muhokama qilindi. Ijro intizomiga sovuqqonlik bilan qaragan mas’ullarga nisbatan keskin choralar ko‘rildi, — deyiladi hokimlik xabarida.
Qayd etilishicha, viloyat hokimi Jarqo‘rg‘on tumani hokimining birinchi hamda xotin-qizlar masalalari bo‘yicha o‘rinbosarini vazifasidan ozod etish va Denov tumani hokimining birinchi o‘rinbosarini Jarqo‘rg‘on tumaniga rotatsiya qilish bo‘yicha topshiriq bergan.
Bundan tashqari Maktabgacha va maktab ta’limi, “Amu Surxon” ITH, Madaniy meros, Nasos stansiyalari va energetika boshqarmalari, “Surxondaryo suv ta’minot” MCHJ va “Surxondaryoyo‘lko‘kalam” DUK rahbarlarini intizomiy jazoga tortish topshirig‘i berildi, — deydi hokimlik mas’uli.
Hokimlik axborot xizmati rahbari Murodbek Davlatovning “Daryo”ga aniqlashtirishicha, Jarqo‘rg‘on tumani hokimining birinchi o‘rinbosari tadbirkorlar murojaatini hal qilmagani uchun, xotin-qizlar masalalari bo‘yicha o‘rinbosari esa fuqarolar murojaatiga befarq qaragani uchun jazolangan.
Qo‘shimcha qilinishicha, qabulda shahar va tuman studiyalari orqali 70 nafar tadbirkorning 81 ta masaladagi murojaati tinglangan. Ko‘tarilgan masalalarning 10 tasi qabul davomida hal etilgan. Qolgan murojaatlarni batafsil o‘rganish va hal etish vazifasi mas’ullarga yo‘naltirilgan. Ijrosi nazoratga olingan.
Izoh (0)