Бухоро вилоятида оғир ва ўта оғир жиноятлар ортаётгани маълум бўлди

Бухоро вилоятида 2023 йилнинг етти ойи мобайнида вилоятда жами 2683 та жиноят қайд этилди, деб хабар беради ЎзА.

Маълум қилинишича, ушбу кўрсаткич ўтган йилга нисбатан 67 тага кўпайган. Жумладан, талончилик 8 тага, товламачилик 6 тага, фирибгарлик 9 тага, безорилик 17 тага ортган.

Шунингдек, ўтган етти ой мобайнида жами 819 та оғир ва ўта оғир жиноят қайд этилиб, ўтган йилга нисбатан 39 тага ёки 5 фоизга ошган.

Август охирларида Бухоро вилояти ИИБ бошлиғи полковник Миржамол Миралимовнинг тегишли фармойиши асосида Маънавият ва маърифат мобил тарғибот гуруҳлари томонидан маҳаллаларда, жамоат жойлари, корхона-ташкилотларда тарғибот-ташвиқот ишлари олиб бориш бошланган эди. 

Унда тарғибот гуруҳларининг асосий вазифалари вилоятда жиноятчиликка, айниқса, фирибгарлик ҳамда ўғирлик жиноятларига қарши курашиш, уларнинг барвақт олдини олиш, аҳолининг интернет жаҳон ахборот тармоғидан фойдаланиш маданиятини ошириш, ғоявий ва ахборот хуружларига қарши мафкуравий иммунитетни кучайтириш ва ёшлар тарбиясига масъулиятсизлик каби иллатларга барҳам беришга қаратилган комплекс чора-тадбирларни амалга оширишдан иборат.