Ukraina armiyasiga 1500-2000 kilometr masofaga uchadigan raketa kerak. Hozirda Ukraina bunday qurollarni yaratish ustida ishlamoqda. Bu haqda iste’foga chiqayotgan Ukraina mudofaa vaziri Aleksey Reznikov ma’lum qildi.
Reznikov Ukraina o‘z ittifoqchilari bilan jang qilish niyatida emasligiga e’tibor qaratdi. Shuning uchun 15 ming kilometr masofaga uchadigan raketa kerak emasligini ta’kidladi. Amaldor Ukraina armiyasiga Rossiya hududini qamrab olish uchun 1500-2000 km masofani bosib o‘tadigan raketalar yetarli ekanini aytdi.
Reznikovdan Ukraina bunday qurollarni ishlab chiqarish ustida ishlayaptimi, degan savolga u: “Ha”, deb javob berdi.
Uning so‘zlariga ko‘ra, Ukraina raketa va raketaga qarshi dasturni faqat katta urush boshlanishidan oldin qabul qilgan.
“Uzoq vaqt davomida o‘zimizning raketa dasturimizga, eng muhimi, bosqindan oldin qabul qilingan raketaga qarshi dasturga ega bo‘lishimiz kerak edi. Lekin bu o‘zimizga, tadbirkorlarimiz tadqiqotiga, sinovlariga milliardlab pul sarflashni bildiradi.
Buni o‘zimizning havo hujumidan mudofaa tizimimiz bo‘lgan payti amalga oshirish kerak edi. Ammo o‘shanda bizda bir nechta S-300 bor edi va hech kim hujum qilmasdi”, — dedi Reznikov.
Reznikov Ukraina mudofaa vaziri lavozimidan ketmoqda
Zelenskiy 3-sentabr kuni kechki murojaatida Ukraina mudofaa vaziri Aleksey Reznikov iste’foga chiqishini, uning o‘rnini esa Ukraina Davlat mulki jamg‘armasiga rahbarlik qilayotgan Rustem Umerovni egallashini aytdi.
Rustem Umerov – kelib chiqishi musulmon qrim-tatar bo‘lgan ukrainalik tadbirkor. Uning oilasi 1944-yilda Qrimdan Markaziy Osiyoga ko‘chirib yuborilgan. Umerov 1982-yil Samarqand viloyatining Bulung‘ur tumanida tug‘ilgan. 1980-yillar oxirida qrim-tatarlarni vataniga qaytarish boshlanganida, Umerovlar oilasi Qrimga qaytishga muvaffaq bo‘lgan.
Izoh (0)