Украина армиясига 1500-2000 километр масофага учадиган ракета керак. Ҳозирда Украина бундай қуролларни яратиш устида ишламоқда. Бу ҳақда истеъфога чиқаётган Украина мудофаа вазири Алексей Резников маълум қилди.
Резников Украина ўз иттифоқчилари билан жанг қилиш ниятида эмаслигига эътибор қаратди. Шунинг учун 15 минг километр масофага учадиган ракета керак эмаслигини таъкидлади. Амалдор Украина армиясига Россия ҳудудини қамраб олиш учун 1500-2000 км масофани босиб ўтадиган ракеталар етарли эканини айтди.
Резниковдан Украина бундай қуролларни ишлаб чиқариш устида ишлаяптими, деган саволга у: “Ҳа”, деб жавоб берди.
Унинг сўзларига кўра, Украина ракета ва ракетага қарши дастурни фақат катта уруш бошланишидан олдин қабул қилган.
“Узоқ вақт давомида ўзимизнинг ракета дастуримизга, энг муҳими, босқиндан олдин қабул қилинган ракетага қарши дастурга эга бўлишимиз керак эди. Лекин бу ўзимизга, тадбиркорларимиз тадқиқотига, синовларига миллиардлаб пул сарфлашни билдиради.
Буни ўзимизнинг ҳаво ҳужумидан мудофаа тизимимиз бўлган пайти амалга ошириш керак эди. Аммо ўшанда бизда бир нечта С-300 бор эди ва ҳеч ким ҳужум қилмасди”, — деди Резников.
Резников Украина мудофаа вазири лавозимидан кетмоқда
Зеленский 3 сентябрь куни кечки мурожаатида Украина мудофаа вазири Алексей Резников истеъфога чиқишини, унинг ўрнини эса Украина Давлат мулки жамғармасига раҳбарлик қилаётган Рустем Умеровни эгаллашини айтди.
Рустем Умеров – келиб чиқиши мусулмон қрим-татар бўлган украиналик тадбиркор. Унинг оиласи 1944 йилда Қримдан Марказий Осиёга кўчириб юборилган. Умеров 1982 йил Самарқанд вилоятининг Булунғур туманида туғилган. 1980 йиллар охирида қрим-татарларни ватанига қайтариш бошланганида, Умеровлар оиласи Қримга қайтишга муваффақ бўлган.
Изоҳ (0)