Yaqinda Samarqandda tantanali nikoh marosimini o‘tkazgan reper Shahriyor aktyor Muhammadali Aliyevga bergan intervyusida AQSHga nima sababdan ketgani, faoliyati va xorijda yashashning mashaqqati haqida gapirdi.
— Oilani moddiy jihatdan ta’minlash erkak kishining burchi hisoblanadi. Insonning san’atkor ekanligi uni oilani boqish majburiyatlaridan ozod qilmaydi. “Ilhomim qachon kelarkan?” deb kutib o‘tirish ham yaramaydi. Ilk marta AQSHga borganimda pul uchun bormaganman. Havo almashtirib, musofirchilikning mazasini tatib ko‘rish niyatim bor edi. Musofirchilikni ko‘rgan inson juda ko‘p narsaning qadriga yetadi. Keyingi borganimda esa ishlashga qaror qildim. Chunki ilhomimni kutib, uydagi qora ko‘zlarimning qornini to‘ydirib bo‘lmaydi. Yigit kishiga qirq hunar oz deyishganidek, men ham o‘zimni boshqa sohada sinab ko‘rishga harakat qildim.
To‘ylardan pul topishni hamma ham eplolmaydi. Agar bu borada omadi kelsa, zo‘r, bu ota-bobolardan qolgan qadriyat. Ammo bizda haligacha mualliflik huquqi to‘g‘ri shakllantirilmagan. Harakatlar bor, balki hammasi tez orada yanada yaxshi bo‘lib ketar, — deydi xonanda.
Shahriyor AQSHda nima ish bilan shug‘ullanayotgani va boshqa hamkasblari bilan munosabatlariga ham oydinlik kiritib o‘tdi.
— San’atdan tashqari, logistika sohasida ham ishlayapman. U yerga ketgan san’atkorlar nima ish qilayotganiga ko‘pchilik qiziqishadi. Bu yerga kelganlarning ko‘pchiligi haydovchi, operator yoki boshqa ishlarni qilishadi. AQSHdagi o‘zbek san’atkorlarining ko‘pi bilan uchrashdim, ammo nima ish bilan shug‘ullanishayotganiga qiziqqanim yo‘q. Ularning o‘zi ham ochiqchasiga aytishgani yo‘q. Buni so‘rash ham odobdan emas, deb hisoblayman. O‘lmas Olloberganov bilan uchrashdim, bilishmcha, u hech qayerda ishlayotgani yo‘q. Bolalarini o‘qitish uchun AQSHga borgan. Davron Ergashev, Ulug‘bek Qodirov bilan ham uchrashganman. Ulug‘bek sherikchilik asosida kompaniya ochgan edi. AQSHda hozir to‘ylar ham ko‘payib qolgan, o‘zbek san’atkorlariga u yerda talab bor. Meni ham to‘y xizmatlariga ko‘p taklif etishadi, — deydi xonanda.
Shahriyor AQSHda yashashning qiyinligi va Meksika orqali kelayotgan o‘zbeklar haqida o‘z mulohazalarini aytib o‘tdi.
— “AQSH — sehrli diyor” degan stereotiplar haligacha bor. To‘g‘ri, bu mamlakatning qulayliklari bor, ammo u yerda ham mehnat qilmasa, hech narsaga erisholmaydi. Minglab insonlar Meksika orqali, noqonuiy yo‘llar bilan AQSHga kelishga harakat qilishadi. Eng yomoni, ular orasida o‘zbeklarning ham borligini ko‘rib, yuragim og‘ridi. Noqonuniy yo‘llar bilan kelgan insonlarning qiyinchiliklarini eshityapmiz, ular haqida tayyorlanayotgan ko‘rsatuvlarni ko‘ryapmiz. Ammo shunda ham keladigan insonlarning soni kamayayotgani yo‘q, — deydi xonanda.
Izoh (0)