Яқинда Самарқандда тантанали никоҳ маросимини ўтказган рэпер Шаҳриёр актёр Муҳаммадали Алиевга берган интервьюсида АҚШга нима сабабдан кетгани, фаолияти ва хорижда яшашнинг машаққати ҳақида гапирди.
— Оилани моддий жиҳатдан таъминлаш эркак кишининг бурчи ҳисобланади. Инсоннинг санъаткор эканлиги уни оилани боқиш мажбуриятларидан озод қилмайди. “Илҳомим қачон келаркан?” деб кутиб ўтириш ҳам ярамайди. Илк марта АҚШга борганимда пул учун бормаганман. Ҳаво алмаштириб, мусофирчиликнинг мазасини татиб кўриш ниятим бор эди. Мусофирчиликни кўрган инсон жуда кўп нарсанинг қадрига етади. Кейинги борганимда эса ишлашга қарор қилдим. Чунки илҳомимни кутиб, уйдаги қора кўзларимнинг қорнини тўйдириб бўлмайди. Йигит кишига қирқ ҳунар оз дейишганидек, мен ҳам ўзимни бошқа соҳада синаб кўришга ҳаракат қилдим.
Тўйлардан пул топишни ҳамма ҳам эплолмайди. Агар бу борада омади келса, зўр, бу ота-боболардан қолган қадрият. Аммо бизда ҳалигача муаллифлик ҳуқуқи тўғри шакллантирилмаган. Ҳаракатлар бор, балки ҳаммаси тез орада янада яхши бўлиб кетар, — дейди хонанда.
Шаҳриёр АҚШда нима иш билан шуғулланаётгани ва бошқа ҳамкасблари билан муносабатларига ҳам ойдинлик киритиб ўтди.
— Санъатдан ташқари, логистика соҳасида ҳам ишлаяпман. У ерга кетган санъаткорлар нима иш қилаётганига кўпчилик қизиқишади. Бу ерга келганларнинг кўпчилиги ҳайдовчи, оператор ёки бошқа ишларни қилишади. АҚШдаги ўзбек санъаткорларининг кўпи билан учрашдим, аммо нима иш билан шуғулланишаётганига қизиққаним йўқ. Уларнинг ўзи ҳам очиқчасига айтишгани йўқ. Буни сўраш ҳам одобдан эмас, деб ҳисоблайман. Ўлмас Оллоберганов билан учрашдим, билишмча, у ҳеч қаерда ишлаётгани йўқ. Болаларини ўқитиш учун АҚШга борган. Даврон Эргашев, Улуғбек Қодиров билан ҳам учрашганман. Улуғбек шерикчилик асосида компания очган эди. АҚШда ҳозир тўйлар ҳам кўпайиб қолган, ўзбек санъаткорларига у ерда талаб бор. Мени ҳам тўй хизматларига кўп таклиф этишади, — дейди хонанда.
Шаҳриёр АҚШда яшашнинг қийинлиги ва Мексика орқали келаётган ўзбеклар ҳақида ўз мулоҳазаларини айтиб ўтди.
— “АҚШ — сеҳрли диёр” деган стереотиплар ҳалигача бор. Тўғри, бу мамлакатнинг қулайликлари бор, аммо у ерда ҳам меҳнат қилмаса, ҳеч нарсага эришолмайди. Минглаб инсонлар Мексика орқали, ноқонуий йўллар билан АҚШга келишга ҳаракат қилишади. Энг ёмони, улар орасида ўзбекларнинг ҳам борлигини кўриб, юрагим оғриди. Ноқонуний йўллар билан келган инсонларнинг қийинчиликларини эшитяпмиз, улар ҳақида тайёрланаётган кўрсатувларни кўряпмиз. Аммо шунда ҳам келадиган инсонларнинг сони камаяётгани йўқ, — дейди хонанда.
Изоҳ (0)