Salomatlik inson uchun bebaho ne’mat. U yo‘qotilganida hech qanday quvonch insonga tatimaydi. Ayrim hollarda kasalliklar kishini sevimli ishidan voz kechishga ham majbur qiladi.
Zaharlanish
Xonanda Oyxon Eshonxonova og‘ir xastalikni boshdan o‘tkazgan. U ovqatdan zaharlanish oqibatida uzoq vaqt tanasidagi toksinlar bilan “kurashgan”. Hatto bir necha bor murakkab jarrohlik amaliyotini ham boshdan kechirgan.
“Immunitetim nihoyatda past. Shu bois farzandlarim sog‘lig‘imga jiddiy e’tibor berishadi. Kundalik ovqatlanish ratsionim ham hamisha e’tiborda, - deydi xonanda. – Sport bilan muntazam shug‘ullanaman va tabiiy usullarda immunitetimni ko‘tarishga harakat qilaman. Chunki dori-darmondan charchaganman”.
Ichak chirishi
“Kipriklari uzun qiz” deya katta sahnaga chiqqan Azizbek Bekmurodov ham og‘ir dardni boshdan kechirgan. 2016-yili to‘satdan tobi qochgan xonandada ingichka ichak bilan bog‘liq jiddiy xastalik aniqlangan. Xonanda ikki marta jarrohlik amaliyotini boshdan o‘tkazgan. Ammo jarohat ichak bilan bog‘liq bo‘lgani uchun shifokorlar bir muddat qo‘shiq kuylamaslikni tavsiya qilishgan.
“Ingichka ichagimning 2 metri chirish jarayonida ekan. Tomog‘imdan ovqat ham o‘tmay qoldi, oylab to‘shakka mixlanganimni-ku, tasvirlab berolmayman”.
Alsgeymer
O‘zbekistonda xizmat ko‘rsatgan artist Jumadulla Rametov bu yil 68 yoshni qarshilaydi. Afsuski, aktyorda Alsgeymer kasalligi aniqlangan. Shu bois u doimiy davolanishda.
— Dadam ma’lum vaqt xotirasini yo‘qotadi. Bu vaqtda qilgan ishlarini sizga aytib bera olmayman. Doktorlar tashxis qo‘yishganiga 2 yil bo‘ldi. Kasallik asabdan keldi, boshida ko‘p narsani unutib, hojatxonani ham topolmay qoldi, — deydi Aziz Rametov.
Limfoma
Ayni damda AQSHda istiqomat qiladigan aktyor Bahrom Matchonovda 2006-yili limfoma kasalligi aniqlangan.
— AQShga kelganimda deyarli ingliz tilini bilmasdim. Xorijda yashash, odamlariga moslashishning o‘ziga yarasha qiyinchiliklari bor. Oradan to‘rt yil o‘tib, menda limfoma xastaligi aniqlandi. Juda tez vazn yo‘qotdim. Charchoq, holsizlik, ko‘p terlash, og‘riqlar...
Dard qanchalik og‘ir bo‘lmasin odam o‘zini qo‘lga olishi, ruhan sinmasligi kerak. Bu xastalik bilan bir-ikkita tanishim ham davolangan. Shu bois, ruhiyatimni cho‘ktirmadim. Amerikalik shifokorlarga ming rahmat, garchi hujjatlarim bo‘lmasa-da, ijtimoiy himoya xodimlarining yordami sabab, bepul davolandim.
“Men kasalman!” degan fikr miyaga o‘rnashib qolsa, tanadagi og‘riqlar yanada zo‘rayadi. Shu bois, kasallik aniqlangan taqdirda ham “Men sog‘lomman, kasallik meni yengolmaydi”, deb o‘z-o‘zini ishontirish sog‘ayishning eng mukammal davosi hisoblanadi, — deydi aktyor intervyularining birida.
Hozirgi kunda uning salomatligi mirmuncha yaxshi va u o‘tgan yili Yolqin To‘ychiyev rejissorligida suratga olingan “Evrilish” filmida suratga tushdi.
Jigar saratoni
Aktrisa Ra’no Shodiyevada jigar saratoni kasalligi aniqlangan. U uzoq vaqtdan buyon muntazam davolanmoqda va bir nechta jarrohlik amaliyotini ham boshdan kechirdi.
— Jigarimning 60 foizini olib tashlashdi va sog‘lomini qoldirishdi. Jigar — bu o‘sadigan a’zo. Xudo xohlasa, olib tashlangan o‘sha foizi bir yil davomida yana ham o‘sib, joyiga tushadi. Oson amaliyot bo‘lmadi, juda qiyin, mashaqqatli. Jigarning o‘zi 300 ta funksiyani bajaradi. Unda qon tomirlari ko‘p. Shuning hammasini joy-joyiga tikib, amalga oshirish kerak”, — deydi Ra’no Shodiyeva.
Ovoz yo‘qolishi
“Sohibqironim” qo‘shig‘i bilan muxlislar e’tiboriga tushgan xonanda Oybek Hamroqulov ham bir necha yil ijodiy tanaffus qilgan. Bunga ovozining yo‘qolishi sabab bo‘lgan. Ba’zilar bunga dushmanchiliklar ham sabab bo‘lganligini taxmin qilishadi. Hozir xonanda kichik tadbirlarda ishtirok etadi, ammo ijodida avvalgidek jo‘shqinlik sezilmayapti.
Oshqozon-ichak tizimidagi muammolar
So‘z ustasi Abdulla Akbarov ham uzoq vaqt sahnalarda ko‘rinmay qoldi. Uning oshqozon-ichak tizimida jiddiy kasallik aniqlanib, uzoq vaqt davolandi. Hozir jismoniy quvvati yetgancha xalq xizmatida bo‘lishga harakat qiladi.
Avtohalokatdan keyingi jarohatlar
“Ummon” guruhining sobiq solisti Zohid Risqiyev avtohalokatdan so‘ng ikkinchi yirik jarrohlik amaliyotini boshdan kechirdi. 8 oy avval unga shifokorlar nafas olishga yordam beruvchi trubka o‘rnatishgandi. Salomatligi ancha tiklangach, uni olib tashlash amaliyoti o‘tkazilgan. Xonandaning turmush o‘rtog‘i Kamola Ortiqovaning aytishicha, Zohid faqatgina olti oydan keyingina qo‘shiq kuylay oladi.
Asilbek Amanulloh
“Boylama” qo‘shig‘i bilan tanilgan xonanda mashhurlik cho‘qqisiga erishgan paytda og‘ir kasallikka chalinganini ko‘pchilik bilmasa kerak.
“2007-yilda og‘ir kasallikka chalindim. Undan qutilish uchun 3-4 yil vaqt ketdi. Tibbiyotda bu kasallik — “fobiyali nevroz” deb ataladi. Hech narsa yoqmay qoldi, odamlar orasiga qo‘shilgim kelmay qoldi. Xayolingizga faqat yomon fikrlar keladi. Tanishlarim seni o‘qitvorishgan, ichingga jin kirgan deyishgan. Odamlar 3 yil tinimsiz shunaqa deyaversa bunga o‘zingiz ham ishonib qolar ekansiz. Lekin kasalligimni baribir shifokorlar davoladi”, — deydi Asilbek.
Izoh (0)