“Opa-singillar” serilidagi Nasiba roli bilan tomoshabinlarga yaxshi tanish bo‘lgan aktrisa Nargiza Sharmetova “Daryo”ning YouTube dagi kanaliga bergan intervyusida faoliyatidagi tanaffusning sabablari, san’atga kirib kelishi va to‘rt yil kutgan farzandini ijodga alisholmagani haqida so‘zlab berdi.
— “Opa-singillar” serialidan keyin ijodiy sokinlik vaqti bo‘ldi. Deyarli film va seriallar suratga olingani yo‘q. Shu bois bor e’tiborimni teatrga qaratdim. Avvaliga o‘zbek, undan keyin rus teatriga ishga olindim. Hozirgi kunda oliy toifali teatr aktrisasiman. Undan keyin oila qurganim ham biroz ijoddan uzilishimga sabab bo‘ldi. Kelinlikning ham o‘ziga yarasha shirin tashvishlari bor. Men ham barcha kelinlar singari qaynona va qaynotamning xizmatida bo‘lishga harakat qildim. Keyin hayotimda o‘ziga yarasha sinovli kunlar ham bo‘ldi. Farzandli bo‘lishni to‘rt yil davomida orziqib kutdim. Bularning bari istaymizmi-yo‘qmi inson ruhiyatiga ta’sir etar ekan. Shukrki, farzandli bo‘ldim. Ammo shuncha yil intizor bo‘lib kutgan farzandimni ijodga almashtirgim kelmadi. Barcha onalar singari uch yil onalik ta’tilida bo‘lib, keyin ijodga qaytdim, —deydi aktrisa Nargiza Sharmetova.
Nargiza Sharmetova san’at institutida o‘qishga ota-onasini qanday ko‘ndirgani va ilk roli uchun rejissordan qattiq ranjigani haqida so‘zlab berdi.
— Oilamizda san’atkorlar yo‘q. Ammo ota-onam bolalikdan ijodga qiziqishgan ekan. Dadam rassomchilik bo‘yicha o‘qiyman deganimda amakim boshqa institutga hujjat topshirtirgan ekan. Onam raqqosa bo‘lishni istaganida esa akalari qarshilik qilgan. San’atga qiziqishimni 10-sinfda o‘qiyotganimda bilib qolganman. O‘shanda teatr to‘garagi ochilgan edi, u sabab qalbimda san’atga bo‘lgan mehr “uxlab” yotganini bildik. Avvaliga ota-onam biroz qarshi bo‘lishdi. Ammo tabiatan qaysarligimni bilishgani uchun “Sinab ko‘rsin-chi, xafsalasi pir bo‘lar” deb kutishdi. Ammo ilk urinishdayoq san’at institutiga qabul qilinganman.
Bir kuni klipmeyker “Klipda suratga tushib bering. Asosiy yuz bo‘lasiz”, deb taklif qilgan. Birinchi rolim, hayajon bilan suratga olish maydonchasiga kelganman. Ammo u kadrda eng orqa planga qo‘ygan. Biroz ranjiganman. “Siz asosiy planda bo‘lasiz, degandingiz-ku”, desam “Kim sizga birdan bunday rollarni beradi?” deb ko‘nglimga og‘ir botadigan gaplarni aytgan. O‘shanda “Qarab turing, men katta film va seriallarda asosiy rollarni ijro etaman”, deb ketganman.
Bir kuni “Sahna nutqi” fanidan dars beradigan ustozim serial suratga olinayotganini aytib qoldi. “Baribir o‘tolmayman” deb ishonqiramay kasting topshirgani bordim. Qizlar shu qadar ko‘p ediki, asti qo‘yaverasiz. Kasting topshirib qaytdim. Bir necha kundan keyin rolga tasdiqlanganimni aytishdi. Bu serial katta maktab vazifasini o‘tadi.
2010-yili esa institutdagi mashg‘ulotlarimizga Zamira Begimqulova kelib, bir nechta kursdoshlarim bilan birga serial kastingiga taklif etgan. Doimgidek talabgorlar ko‘p edi. Bir necha kundan keyin Zamira opa qo‘ng‘iroq qilib rolga tasdiqlanganimni aytdi. Men Shahnoza rolini o‘ynasam kerak deb o‘ylagandim. Ammo Nasiba roliga olindingiz, deyishganida qo‘rqib ketdim. Chunki bu rolning mas’uliyati juda katta edi. Keyin bilsam Zamira Begimqulova seraildagi opa-singillarni ota-onalari rolini ijro etgan Mahmud Ismoilov va Sayyora Yunusovaga o‘xshash chehralarni izlashgan ekan, — deydi aktrisa Nargiza Sharmetova.
Izoh (0)