Ўзбекистонда талабаларга ётоқхона тўлови бўйича имтиёзни олий таълим муассасалари Кенгаши белгилайди. Бу ҳақда Telegramъдаги “Таълим назорати” канали хабар берди.
Ушбу имтиёз қуйидаги шаклларда берилиши мумкин:
Ётоқхона тўловларидан бутунлай озод этилади
- кўз касалликлари бўйича 1-2-гуруҳ ногиронлиги борлар;
- чин етимлар (ота-онасининг ҳар иккиси вафот этганлар) ва етимлар (ота-оналаридан бири вафот этганлар);
- меҳрибонлик уйи тарбияланувчилари;
- ҳамда ижтимоий ҳимояга муҳтож талабалар.
Умумий тўловдан 50 фоиз чегирма берилади
- умумий касалликлар бўйича 2-гуруҳ ногиронлари;
- вазифасини намунали бажараётган талабалар кенгаши раиси, қават сардори ҳамда ётоқхона кутубхонаси учун масъул талабаларга.
Март ойида Ўзбекистонда 2023 йил якунига қадар 18 минг ўринли талабалар турар жойлари қурилиб, фойдаланишга топширилиши тўғрисида хабар берилганди. Ўшанда йил якунига қадар талабалар турар жойи фондини 127 минг ўриндан ошириш режалаштирилгани айтилган эди.
Август ўрталарида олий таълим, фан ва инновациялар вазири Иброҳим Абдураҳмонов Тошкент шаҳрида жойлашган олий таълим муассасалари ректорлари ва проректорлари билан учрашиб, талабалар турар жойлари масаласини муҳокама қилганди. Унда университет ҳудудларида талабаларни ётоқхоналар ва ижара уйларига жойлаштириш марказларини йўлга қўйишга, уларда лидер талабалар ҳамда тюторларнинг фаолиятини ташкил қилишга келишиб олинган эди.
Изоҳ (0)