O‘zbekistonda 2023-yil yakuniga qadar 18 ming o‘rinli talabalar turar joylari qurilib, foydalanishga topshiriladi. Bu haqda Oliy ta’lim, fan va innovatsiyalar vazirligi matbuot xizmati rahbari Nazokat Abduqunduzova ma’lum qildi.
Uning qayd etishicha, so‘nggi yillarda respublikada yoshlarning oliy ta’lim bilan qamrovi oshib borishi bilan bir qatorda, yotoqxonalarga bo‘lgan ehtiyoj ham ortib bormoqda.
Bugungi kunda davlat OTMlaridagi talabalar turar joylarining soni 287 taga yetkazilib, jami 109 504 nafar talabalarni joylashtirish imkoniyati yaratildi. Shunga qaramasdan, qo‘shimcha 132 ming o‘rinli talabalar turar joyiga talab mavjud. Ushbu ehtiyojni qondirish maqsadida prezidentning “2022—2026-yillarga mo‘ljallangan Insonga e’tibor va sifatli ta’lim yilida amalga oshirishga oid davlat dasturi to‘g‘risida”gi farmoniga asosan 2023-yil yakuniga qadar 18 ming o‘rinli talabalar turar joylarini qurish va foydalanishga topshirish belgilangan.
2023-yilda yotoqxonalarni barpo etish bo‘yicha jami 28 526 o‘rinli 58 ta loyiha amalga oshirilmoqda, jumladan, davlat-xususiy sheriklik asosida 19576 o‘rinli 40 ta, oliygoh va byudjet mablag‘lari hisobidan 3450 o‘rinli 7 ta, oliygohlarning to‘liq o‘z mablag‘lari hisobidan 3 900 o‘rinli 8 ta hamda investitsiya dasturi doirasida 1 600 o‘rinli 3 ta loyihalarda tegishli ishlar amalga oshirilyapti.
Ayni damda respublika bo‘yicha jami 16 466 o‘rinli 31 ta loyihada qurilish ishlari jadal suratlarda olib borilmoqda. Ushbu binolarga zamon talablariga mos ravishda quyosh panellari o‘rnatilib, tashqi devor qismi bazalt issiqlikni ta’minlovchi material bilan qoplanadi.
Yil yakuniga qadar talabalar turar joyi fondini 127 ming o‘rindan oshirish rejalashtirilgan.
Izoh (0)