O‘zbekistonda yangi o‘quv yili boshlanishiga qadar 11 ta talabalar turar joyi foydalanishga topshiriladi

Oliy taʼlim, fan va innovatsiyalar vazirligi tomonidan respublika bo‘yicha 38 ming o‘rinli 83 ta talabalar turar joyini barpo etish loyihalari amalga oshirilmoqda. Bu haqda vazirlik matbuot kotibi Nazokat Abduqunduzova Farg‘ona vodiysidagi oliy o‘quv yurtlariga uyushtirilgan press-tur davomida maʼlum qildi deya xabar beradi “Daryo” muxbiri Azizbek Abduvaliyev. 

Ushbu loyihalarning 50 tasi davlat-xususiy sheriklik tamoyili asosida amalga oshirilmoqda.

“2023-yil yakuniga qadar 18 ming o‘rinli 45 ta talabalar turar joyini foydalanishga topshirish vazifasi belgilangan. 1-iyul holatiga ulardan 12 tasi qurib bitkazildi. Ayni paytda 51 ta talabalar turar joyi qurilishi jadal surʼatlarda davom etmoqda. Yangi o‘quv yili boshlanishiga qadar esa respublika bo‘yicha 6400 o‘rinli 11 ta talaba turar joyi foydalanishga topshiriladi”, — deydi Nazokat Abduqunduzova. 

Vazirlik mutasaddisining taʼkidlashicha, talabalarni turar joy bilan taʼminlashning shaffof va samarali tizimini joriy etish maqsadida Vazirlar Mahkamasi qarori qabul qilingan. Mazkur qaror bilan talabalar turar joyiga joylashish davlat xizmati markazlari va Yagona interaktiv davlat xizmatlari portali orqali elektron ariza berish yo‘li bilan amalga oshirilishi, talabalarga esa navbatni onlayn kuzatish va to‘lovlarni amalga oshirish imkoniyati yaratilmoqda. 

Ijara uylariga ehtiyoj eng yuqori bo‘lgan va yangi o‘quv yili boshida muammo yuzaga keladigan Toshkent shahrida talabalarni turar joy bilan taʼminlashga alohida eʼtibor qaratilmoqda. Poytaxtda 48976 nafar talaba ijara asosida xususiy xonadonlarda yashashiga to‘g‘ri kelishi hisob-kitob qilingan. Ulardan 23774 nafari Toshkentda ijara xonadoni mavjud ekanligini maʼlum qilgan. 

Shu tariqa ijara xonadonlariga joylashishga muhtoj bo‘lgan talabalar soni 25 mingdan ortiqni tashkil etmoqda. Mazkur tahlillardan kelib chiqib, oliy taʼlim muassasalarida mahalla raislari bilan hamkorlikda bo‘sh turgan xonadonlarni izlab topish ishlari amalga oshirildi.

Uy egalari bilan suhbatlardan so‘ng jami 9523 ta ijara xonadonning manzilli ro‘yxatlari shakllantirildi. Hisob-kitoblarga ko‘ra, mazkur xonadonlarga ushbu talabalarni to‘liq joylashtirish imkoniyati mavjud.

 “Xonadonlarga joylashgan talabalarga ijara to‘lovining bir qismini qoplab berish ham yangi tartib asosida amalga oshiriladi. Oylik ijara to‘lovi uchun, ijara shartnomasining summasidan qatʼi nazar, Toshkentda bazaviy hisoblash miqdorining bir baravari, yaʼni 330 ming so‘m, qolgan hududlarda esa yarim baravar — 165 ming so‘m miqdorida to‘lanishi belgilab qo‘yildi”, — deydi vazirlik matbuot kotibi.

Press-tur ishtirokchilari vodiyga safar davomida Qo‘qon pedagogika instituti, TATU Farg‘ona filiali, Farg‘ona davlat universiteti va politexnika instituti, Andijon davlat universiteti, Andijon tibbiyot, mashinasozlik va paxtachilik institutlari, Namangan davlat universiteti va Namangan muhandislik-qurilish institutida bo‘lib, ushbu oliy o‘quv yurtlarida qurib bitkazilgan va barpo etilayotgan talablar turar joylari bilan tanishdi.