O‘zbekistonda turli yoshdagi bolalarda 50 ga yaqin buyrak ko‘chirib o‘tkazish amaliyoti bajarildi. Bu haqda Sog‘liqni saqlash vazirligi matbuot xizmati maʼlum qildi.
Taʼkidlanishicha, tibbiyot, xususan, transplantatsiya sohasini rivojlantirish va uning moddiy-texnik bazasini mustahkamlashga qaratilayotgan eʼtibor natijasida buyrak va jigar ko‘chirib o‘tkazish kabi murakkab amaliyotlarni O‘zbekistonning o‘zida bajarish yo‘lga qo‘yildi.
“Xususan, 2017-yildan akademik V.Vohidov nomidagi Respublika ixtisoslashtirilgan xirurgiya ilmiy-amaliy tibbiyot markazida buyrak transplantatsiyasi bo‘yicha operatsiyalar muvaffaqiyatli bajarib kelinayotgan bo‘lsa, 2021-yildan tibbiyotimiz tarixida ilk bor mahalliy mutaxassislar tomonidan jigar ko‘chirib o‘tkazish yo‘lga qo‘yildi.
Natijada yurtimizda ushbu noyob jarrohlik muolajalari orqali o‘z salomatligini tiklagan bemorlar soni 15 barobarga ortib, yiliga 350 tani tashkil qildi. Qolaversa, 2017-2023-yillarda 1 ming 100 ta buyrak transplantatsiyasi va 70 dan ortiq jigar transplantatsiyasi amalga oshirildi. Vaholanki, bu raqam 2017-yilda atigi 27 tadan iborat edi.
Qo‘shimcha qilinishicha, mazkur yo‘nalishda tajriba va ko‘nikmalar oshirilib, bugungacha turli yoshdagi bolalarda 50 ga yaqin buyrak ko‘chirib o‘tkazish amaliyoti bajarildi.
Bundan tashqari, yurtimizda inson organlarini ko‘chirib o‘tkazish sohasida malakali mutaxassislar tayyorlash tizimi ham samarali yo‘lga qo‘yildi. Ayni paytda ular xorijiy davlatlarda malaka oshirib, chet ellik mutaxassislar bilan qo‘shma jarrohlik amaliyotlarida ishtirok etmoqda”, – deyiladi vazirlik axborotida.
Maʼlumot uchun, “Inson aʼzolari va to‘qimalarining transplantatsiyasi to‘g‘risida”gi O‘zbekiston Respublikasi qonuni qabul qilingan.
Avvalroq, qariyb 50 turdagi oftalmologik kasalliklarni davolash yo‘lga qo‘yilgani va faqat respublika markazida bajariladigan neyrojarrohlik amaliyotlarining qariyb 40 foizi endilikda barcha hududlarda bajarilayotgani maʼlum qilingan edi.
Izoh (0)