Namanganda bir oy avval yong‘in yuz bergan Chortoq dehqon bozori qayta qurilib, foydalanishga topshirildi (video)

Namanganda bundan qariyb bir oy avval ro‘y bergan yong‘indan jiddiy zarar ko‘rgan Chortoq dehqon bozori qayta qurilib, foydalanishga topshirildi. Bu haqda “Daryo” muxbiri Azizbek Abduvaliyev xabar bermoqda.

Bozorning 16 ta pavilyonida 350 ta savdo rastasi barpo etilib, sotuvchi va xaridorlarga qulay sharoit yaratildi. Oziq-ovqat va nooziq-ovqat mahsulotlari alohida joylashtirildi.

 

 

Majmuadagi savdo do‘konlarida ham qurilish-taʼmirlash ishlari olib borilib, atrof obodonlashtirildi. Darvozadan kirishda favvoralar ishga tushirildi.

 

 

“Bozorda ro‘y bergan yong‘indan so‘ng bu yerni qisqa muddatda avvalgidan ham yaxshi holatga keltirish uchun astoydil saʼy-harakatlar olib borildi. Buning uchun 5 milliard so‘mga yaqin mablag‘ sarflandi. Bozor va uning atrofida obodonlashtirish ishlari hali yana davom ettiriladi”, — dedi tadbirda ishtirok etgan viloyat hokimi Shavkat Abdurazzaqov.

 

 

Maʼlumot uchun, Chortoq dehqon bozorida joriy yil 5-avgust kuni tongda yuz bergan yong‘in oqibatida 6 ta do‘kon, 35 ta savdo rastasi yonib ketgandi.