“Daryo” reportaji: Namanganda Chortoq dehqon bozorida ro‘y bergan yong‘in asoratlari bartaraf etilmoqda (foto va video)

Namanganda Chortoq dehqon bozorida ro‘y bergan yong‘in asoratlari bartaraf etilmoqda. Bu haqda “Daryo” muxbiri Azizbek Abduvaliyev xabar bermoqda.

Viloyat Favqulodda vaziyatlar boshqarmasi mutasaddilarining bildirishicha, 5-avgust kuni tongga yaqin sodir bo‘lgan yong‘inni o‘chirish uchun 9 ta ekipaj safarbar qilingan. Shuningdek, hamkor tashkilotlarning suv tashish mashinalari ham jarayonga jalb etilgan.

Mazkur saʼy-harakatlar natijasida bozorning 40 00 kvadrat metr hududi olovdan saqlab qolingan. Biroq shunda ham 6 ta do‘kon va 35 ta savdo rastasi yonib ketgan.

Jumladan, tadbirkor Akram Matkarimovning aytishicha, shu yerda joylashgan fotostudiyasiga yong‘in tufayli jiddiy zarar yetgan va 40 ming dollarlik apparaturasi yaroqsiz holatga kelgan.

Chortoq dehqon bozori maʼmuriyati xodimi Komiljon Mamajonovning bildirishicha, hozirda bozor hududini yong‘in asoratlaridan tozalash ishlari olib borilmoqda. Hokimlik tomonidan tashkil etilgan shtab ushbu jarayonni muvofiqlashtirish va yong‘in oqibatida zarar ko‘rgan tadbirkorlarning murojaatlarini ko‘rib chiqish bilan shug‘ullanmoqda.

Tozalash ishlari yakunlanganidan so‘ng yangi savdo rastalari va do‘konlarni tiklash, mavjudlarini esa taʼmirlashga kirishiladi.

Qayd etish joizki, Chortoq bozorida sodir bo‘lgan hodisadan so‘ng viloyatdagi barcha bozorlarda yong‘in xavfsizligi bilan bog‘liq tadbirlar boshlangan.