Shu kunlarda ijtimoiy tarmoqlarda Qiziltepa tumanining To‘dako‘l suv havzasi bo‘yicha o‘tkazilishi kutilayotgan “Stixiya” festivali keng jamoatchilikning salbiy fikrlari va muhokamalariga sabab bo‘lmoqda. Navoiy viloyati hokimligi mazkur holatga munosabat bildirdi.
Qayd etilishicha, Navoiy viloyati hokimligi rahbariyati ijtimoiy tarmoqlarda tarqatilayotgan va e’tirozlarga sabab bo‘layotgan mazkur jarayonga aslo befarq emas. Shuningdek, hokimlik ma’naviyatga zid, mentalitetga xos bo‘lmagan, yoshlarni turli yot g‘oyalarga targ‘ib qiluvchi har qanday tadbirga qarshi ekanini ma’lum qiladi.
Shu bois, “Stixiya” festivalini o‘tkazuvchi Unidentified Projects Company MCHJ rahbariyati viloyat hokimligi tomonidan yuqorida qayd etilgan holatlar sodir etilmasligi bo‘yicha rasman ogohlantirilgan.
“Ushbu MCHJ rahbariyatidan viloyat hokimining nomiga mazkur festival doirasida ma’naviyatimizga zid, yoshlarimiz ongiga salbiy ta’sir ko‘rsatuvchi holatlarga yo‘l qo‘yilmasligi bo‘yicha kafolat xatlari olingan”, — deyiladi munosabatda.
Unidentified Project Company MCHJ boshqaruv direktori Otabek Sulaymonovning Navoiy viloyati hokimi nomiga yo‘llagan xatidan ko‘rish mumkinki, festivalda kuchli alkogol ichimliklarini sotish va iste’mol qilish taqiqlanadi. Shuningdek, festivalda tartibni saqlashga 45 nafar qo‘riqchi jalb etiladi, tartibbuzarlar festival o‘tkaziladigan hududdan chiqarib yuboriladi.
Eslatib o‘tamiz, 2018-yilda Mo‘ynoq tumanida Centil Law Film, TrendSetter, Peopletravel tashkilotlari tashabbusi hamda sobiq Turizmni rivojlantirish davlat qo‘mitasi, BMTning Taraqqiyot Dasturi ko‘magi bilan “Stixiya” elektron musiqiy festivali o‘tkazilgandi. Festival Mo‘ynoqda – “Kemalar qabristoni” oldida tashkil qilingan, turli ranglardagi yog‘dular, musiqiy ovozlar dengiz tomon yo‘naltirilgan edi.
Izoh (1)
халқни ғазабини қӯзғайдиган очиқ сочиқ уятсизларча шармандаликни кӯрсатманглар ва шундай кӯринишлар бизнинг менталитетимизга тӯғри келмайди устозингиз яҳудийлар бӯлса ӯша юртларда бориб шу масхарабозликни курсатинг фақат бизнинг ӯзӣекистонимизда эмас ҳамма жойни ҳаром ишлар ва фоҳишабозликлар босишига қаршимиз