O‘zbekistonlik olimlar Tottori universiteti tadqiqotchilari tomonidan Yaponiyaning SATREPS dasturi bo‘yicha jalb etilgan 5 million dollar miqdoridagi grant loyihasi doirasida shartnomada ko‘rsatilgan uskunalar respublikaning belgilangan hududlariga olib kelib o‘rnatilmoqda. Bu haqda “Dunyo” agentligi xabar berdi.
O‘zbekiston oliy taʼlim, fan va innovatsiyalar vazirligi axborot xizmatining ma’lum qilishicha, Orolbo‘yi mintaqasida tuproq sho‘rlanishiga qarshi kurash, yer unumdorligi va oziq-ovqat xavfsizligini oshirish uchun suv resurslaridan foydalanishni monitoring va nazorat qilishning yangi texnologiyalarini ishlab chiqishga qaratilgan Yaponiya hukumati tomonidan moliyalashtiriladigan mazkur grant loyihasi shartlariga ko‘ra Yaponiya tomonidan moddiy-texnik baza bilan ta’minlash nazarda tutilgan.
“Bugungi kunga qadar olib kelingan uskunalar tuproq tarkibidagi tuz miqdori, tuproqda tuz va suv taqsimotini, suv sifatini nazorat qilish, geoaxborot tizimi ma’lumotlarini va meteorologik kuzatuvlarni tahlil qilishga mo‘ljallangan. Shuningdek, stansiyalar tajribasida qaysi galofitlar oqsil va tuzni qancha muddatda o‘zlashtirilishini aniqlovchi qimmatli ma’lumotlarni olish imkoniyatini beradi”, — deyiladi xabarda.
Shu bilan birga, dastur doirasida 2023-yil yakuniga qadar Yaponiya tomonidan 300 ming dollar miqdorida obyektlarni masofadan o‘rganuvchi dronlar, iqlim o‘zgarishini va havo namligini tahlil qiluvchi innovatsion meteostansiyalar hamda daryo suvlari balansi va sifatini aniqlab beruvchi qurilmalar olib kelish va respublikaning belgilangan hududlariga o‘rnatish ishlari olib borilmoqda.
2017-yil iyulda Shavkat Mirziyoyev Toshkent viloyatidagi qishloq xo‘jaligi yer maydonlarini monitoringdan o‘tkazish ishlarining taqdimoti bilan tanishgandi. O‘shanda prezidentga qishloq xo‘jaligida dron An-2 samolyotidan afzal ekani ko‘rsatib berilgan. Shundan keyin davlat rahbari uchuvchisiz parvoz qiluvchi zamonaviy qurilmalar — dronlar qishloq xo‘jaligida muhim ahamiyatga ega ekanini aytib, ularni ishlab chiqarishni o‘zlashtirishga e’tibor qaratish lozimligini ta’kidlagan edi.
“O‘zbekiston Respublikasida uchuvchisiz uchadigan apparatlardan foydalanishni tartibga solish bo‘yicha qo‘shimcha chora-tadbirlar to‘g‘risida”gi Vazirlar Mahkamasi qaroriga ko‘ra, respublika hududida uchuvchisiz uchadigan apparatlar, ularning butlovchi va ehtiyot qismlarining belgilangan tartibda majburiy deklaratsiya qilinadigan tranzitidan tashqari qonunga xilof ravishda olib kirish, sotish, sotib olish, saqlash yoki ulardan foydalanish taqiqlanadi.
Izoh (0)