Юртимизда жами 49 турдаги офталмологик касалликларни даволаш бўйича 172 турда тиббий хизматлар кўрсатишга эришилди. Бу ҳақда Соғлиқни сақлаш вазирлиги матбуот хизмати “Дарё”га маълум қилди.
Таъкидланишича, 2018—2022 йилларда Республика ихтисослаштирилган кўз микрохирургияси илмий-амалий тиббиёт маркази 4,5 млн доллар қийматидаги 145 та юқори технологик тиббий ускуналар билан таъминланган.
“Кўз микрохирургияси марказида дунё андозаларига мос равишда жарроҳлик фаоллиги 99,4 фоизга етказилди.
Ўтган давр мобайнида марказнинг деярли барча филиалларида катаракта жарроҳлигининг “Олтин стандарти” катаракта факоэмулсификация, кўз олмасининг олди ва орқа қисмидаги барча турдаги лазер жарроҳликлари усуллари, оптик когерент томография (ОКТ), ултратовушли биомикроскопия (УБМ) диагностика усуллари кенг жорий қилинди.
Самарқанд, Қорақалпоғистон ва Бухоро филиалларида илк бора кератопластика ва витреоретинал жарроҳлик усуллари амалиётга жорий этилди. Куни кеча, яъни 2023 йил 25 август кунида Навоий вилояти филиалида илк бора кўз олмасининг олди ва орқа қисмидаги лазер жарроҳлик усуллари ва асоратли катаракта сунъий кўз гавҳарини кўз склерасига тикиш амалиёти бажарилди”, — дейилади вазирлик ахборотида.
Қўшимча қилинишича, марказда республикада ягона бўлган диагностика ва даволаш сифатини назорат қилиш гуруҳи (даволаш назорати гуруҳи) ташкил этилган бўлиб, даволанган беморларга кўрсатилган тиббий ёрдам сифатини баҳолайди.
Даволанган беморларнинг сони ва сифатига баҳо бериш бўйича махсус компьютер дастури, ходимларнинг меҳнатига қараб иш ҳақини ишлаб чиқиш бўйича компьютер дастури тизими мавжуд. Электрон касаллик тарихи ишлаб чиқилган ва татбиқ этилган.
Маълумот учун, президент Шавкат Мирзиёевнинг 2017 йилда Сурхондарё вилоятига ташрифида Республика офталмология соҳасида телемедицинани ташкиллаштириш топшириғига биноан 2019 йилда жами 120 минг АҚШ доллари миқдоридаги маблағ эвазига жами 14 та махсус рақамли биомикроскоп (тирқишли лампа) ҳудудларга юборилган. Шунингдек, Isuzu русумидаги автобуслар негизида 13 дона мобил поликлиника ташкил этилди ва 5 хил замонавий офталмологик ускуналар билан жиҳозланди.
Изоҳ (0)