“Kundalik.com” platformasi o‘z faoliyatini “emaktab.uz” sifatida davom ettiradi

Maktabgacha va maktab taʼlim vazirligi “Kundalik.com” platformasi o‘z faoliyatini “emaktab.uz” sifatida davom ettirishini ma’lum qildi.

“Kundalik.com” — bu raqamli taʼlim platformasi bo‘lib, o‘quvchilarning davomati va yutuqlarini jurnal hamda kundalikning elektron shaklida yuritish imkonini bergan. Yangi o‘quv yilidan boshlab “Kundalik.com” platformasi o‘z faoliyatini “emaktab.uz” sifatida davom ettiradi.

Maktabgacha va maktab taʼlimi vazirligi mutaxassisi Arslonbek Rahmonqulovning bildirishicha, “Kundalik.com” platformasida ayrim kamchiliklar bor edi. Noto‘g‘ri talqinlarni bartaraf etish maqsadida “emaktab.uz” platformasiga o‘tishga qaror qilindi. Bu tizimni yaratish uchun soha mutaxassislari ko‘p izlanish va o‘rganishlar olib bordi. Tizim yanada takomillashtirildi va zamon talablariga moslashtirildi.

“emaktab.uz” nafaqat elektron kundalikni va elektron jurnalni, balki o‘qituvchilar uchun   “kundalik smart” tizimini ham o‘z ichiga olgan.  Bunda o‘qituvchi uyga vazifa berayotganida raqamli taʼlim resurslaridan foydalangan holda bolalarni taʼlimga jalb qilish uchun ko‘pgina imkoniyatlardan foydalanishi mumkin. Misol uchun, o‘qituvchi o‘quvchiga uyga vazifani o‘yin yoki multfilm shaklida berishi ham mumkin.

Ma’lum qilinishicha, “emaktab.uz” platformasiga o‘tish uchun ijtimoiy so‘rovnomalar tashkil qilinib, jamoatchilik fikri o‘rganib chiqildi. Ushbu platformaga o‘tish o‘qituvchini ortiqcha qog‘ozbozlik tashvishidan ozod etadi. Shaffoflikni taʼminlaydi. Ota-onalar farzandining taʼlim olish jarayonini nazorat qilishga jalb qilinadi. Ota-ona bu mobil ilovani yuklab olsa, dunyoning qaysi nuqtasida bo‘lmasin, farzandining davomatini, baholarini va ertangi dars rejalarini tekshirish imkoniga ega bo‘ladi.

Ilgari baholarni o‘zgartirish, o‘quvchi kundalikni yo‘qotib qo‘yish kabi muammolar ko‘p uchragan, “emaktab.uz” platformasida bu muammolar bo‘lmaydi, har bir o‘zgartirish o‘z izini qoldiradi.

Yangi baholash tartibi o‘quvchilarning umumtaʼlim fanlarini o‘zlashtirishini yagona standartlar asosida baholash tartibini belgilaydi. O‘quvchilarning biror bir fanni o‘zlashtirishi formativ va summativ baholash turlari asosida baholab boriladi.

Formativ baholash — bu o‘qituvchi va o‘quvchi o‘rtasidagi doimiy fikr almashish, muloqot qilish jarayonidir. Formativ baholash asosan o‘quvchini yo‘naltirish, rag‘batlantirish xususiyatiga ega. Bu o‘quvchiga ko‘proq rag‘bat, motivatsiya berishga xizmat qiladi.

Summativ baholash esa maʼlum bir bob yakunida o‘quvchi egallashi kerak bo‘lgan standart bilim va ko‘nikmalar baholanadi.

Summativ va formativ baholash tizimi taʼlimi rivojlangan deyarli barcha mamlakatlarga joriy etilgan bo‘lib, bu tizim kelgusida maktab taʼlimida inson omili, nisbiy baho berishga barham berish, o‘quvchilarni haqqoniy baholashga xizmat qiladi.