Мактабгача ва мактаб таълими вазирлиги 2023/2024-ўқув йили бошланиши муносабати билан боғчаларда “Салом, боғча”, мактабларда “Биринчи қўнғироқ”, “Мустақиллик дарси” тадбирларини ўтказиш бўйича тавсия ҳамда намунавий сценарий ишлаб чиқди.
Унга кўра, мактабларда 4 сентябрь куни соат 8:00 да “Биринчи қўнғироқ” тадбирлари “Янги ҳаёт учун, янги Ўзбекистон учун” шиори остида ўтказилади.
Ўқувчилар хавфсизлигини таъминлаш мақсадида тадбирни 1 ва 11-синф ўқувчилари иштирокида ўтказиш, мактабдаги ўқувчилар сони ва тадбир ўтказиш жойи ҳисобга олиниб, қолган синф ўқувчиларини тадбирга жалб этиш лозим.
Тадбир мактаб ҳовлиси, боғи, соя-салқин очиқ майдонларда ўтказилиши, ўқувчилар хавфсизлиги таъминланиб, мактаб ҳудудига автотранспорт воситалари киритилмаслик чоралари кўрилиши керак.
Тадбир иштирокчилари, айниқса, 1-синф ўқувчиларини чарчатиб қўймаслик мақсадида тадбир давомийлиги 45 дақиқадан ортиқ бўлмаслиги тавсия этилади.
1-синф ўқувчиларига “Президент совғаси” маҳаллий ҳокимликлар, ўзини ўзи бошқариш органлари, ота-оналар иштирокида топширилади.
“Биринчи қўнғироқ” чиройли, кўтаринки руҳда, байрамона ўтказилишида жойлардаги маҳаллий ҳокимликлар, ўзини ўзи бошқариш органлари, ота-оналар, касаба уюшмаси, маҳалла ва ҳамкор ташкилот вакиллари жалб этилиши мумкин.
4—5 сентябрь кунлари мактабгача таълим ташкилотларида “Ўзбекистон — менинг Ватаним” мавзусида очиқ машғулотлар ташкил этилади.
“Мустақиллик дарси” меҳнат фахрийлари, фахрий ўқитувчилар, давлат мукофотига сазовор бўлганлар ва таниқли спортчилар иштирокида ташкил этиш тавсия этилади.
Изоҳ (0)