Oliy Majlis Senati raisi Tanzila Norboyeva AQSH Kongressi Senati aʼzosi, senator-demokrat Gеri Pitersni qabul qildi. Bu haqda parlament yuqori palatasi matbuot xizmati xabar berdi.
Ma’lum qilinishicha, uchrashuvda O‘zbekiston—AQSH hamkorligining keng doirasi, xususan, parlamentlararo aloqalarni mustahkamlash, savdo-iqtisodiy, mehnat munosabatlari, gender tengligi sohalarida hamkorlikni rivojlantirish masalalari muhokama qilingan.
Suhbat davomida iqtisodiy hamkorlik masalalariga ham eʼtibor qaratilgan. Ikki tomonlama strategik sheriklikni mustahkamlashga tarkibiga 38 ta yetakchi kompaniya kiradigan Amerika—O‘zbekiston savdo palatasi salmoqli hissa qo‘shayotgani, 2023-yilning yanvar—iyul oylarida tovar ayirboshlash hajmi 321,5 million dollarni tashkil etgani taʼkidlangan. Investitsiyaviy hamkorlikni kengaytirish va ikki davlat ishbilarmon doiralari o‘rtasidagi aloqalarni mustahkamlash yuzasidan fikr almashilgan.
Shuningdek, mehnat munosabatlari yo‘nalishidagi hamkorlikni izchil davom ettirish, bunda munosib mehnat sharoitlarini yaratish, mehnat sohasiga xalqaro standartlarni joriy etish kabi masalalarda doimiy maslahatlashuvlarni olib borishga kelishib olingan.
“Markaziy Osiyo—AQSH” C5+1 formatidagi muloqot doirasida kelgusi yilda Amerika tomoni (USAID) bilan tadbirkor ayollarning C5+1 formatida o‘tadigan Xalqaro forum, unda tadbirkor ayollarning faol ishtiroki masalalari ham muhokama qilingan.
“Inson huquqlarini taʼminlash, eʼtiqod va so‘z erkinligi masalalari ham alohida eʼtibor markazida bo‘ldi. Muloqot so‘ngida tomonlar barcha sohalarda o‘zaro manfaatli hamkorlikni yanada kengaytirish va chuqurlashtirishga tayyor ekanliklarini bildirdilar”, — deyiladi xabarda.
Prezident Shavkat Mirziyoyev 25-avgust kuni AQSH Senati Milliy xavfsizlik va hukumat ishlari bo‘yicha qo‘mitasi raisi Geri Pitersni qabul qilgandi. Uchrashuvda O‘zbekiston bilan AQSH o‘rtasidagi strategik sheriklik munosabatlarini yanada mustahkamlash masalalari ko‘rib chiqilgan.
Izoh (0)